„Премиерот ни кажа дека не е пристојно да ги навредуваме професорите. Како професор, многу добро знаете дека вистината никогаш не може да биде навреда. Навреда е омаловажувањето на студентите, навреда е фактот што вие не ги плаќате студентите со сумата со која треба да ги плаќате согласно субвенционираниот студенски оброк. Навреда, исто така, е и да станете професор на факултет како асистент на татко ви“, рече претставникот на Форумот за образовни промени, Бленди Ходаи
Секогаш кога ве критикуваме како премиер, вие се браните како професор. Како сакате да ви се обратам денеска – како премиер или како професор? Ваква е реакцијата на претставникот на Форумот за образовни промени, Бленди Ходаи, откако премиерот Христијан Мицкоски денеска рече дека бил непријатно изненаден и шокиран од начинот на кој, како што оцени, со неодамнешната изјава на Ходаи биле навредувани редовни професори.
Мицкоски како навредлива ја протолкува изјавата што Бленди Ходаи ја даде во петокот, откако поднесе тужба против МОН поради износот на студентскиот оброк, побара Владата и Собранието да ги отворат вратите за студентите, за и тие да можат да јадат бифтек по цена од 160 денари, како пратениците и министрите.
„Премиерот ни кажа дека не е пристојно да ги навредуваме професорите. Како професор, многу добро знаете дека вистината никогаш не може да биде навреда. Навреда е омаловажувањето на студентите, навреда е фактот што вие не ги плаќате студентите со сумата со која треба да ги плаќате согласно субвенционираниот студенски оброк. Навреда, исто така, е и да станете професор на факултет како асистент на татко ви“,
рече Ходаи во реакцијата на денешната изјава на Мицкоски.
Во видео објавено на Фејсбук, насловено како „Одговор за нежниот премиер“, Ходаи го повика Мицкоски наместо по социјалните мрежи и по медиумите, да се соочат и да дебатираат во живо во скопската чаршија.
„Нормално, ако не се навредите, и нормално вие може да изберете дали сакате да дебатирате како премиер или како професор“,
рече Ходаи во видеообјавата на Фејсбук.
Освен што рече дека изјавите на Ходаи ги наоѓа како навредиви за професорите, премиерот Мицкоски денеска одговарајќи на новинарски прашања, на студентите им порача дека ги смета за свои пријатели и поддржувачи и дека ќе продолжи да ги поддржува и по завршувањето на неговиот политички ангажман, кога планира повторно да се врати на универзитетот. Рече дека Владата работи на можност студентите одобрената месечна сума да ја користат не само за оброк, туку и за дополнителни попусти и поволности во трговските синџири.