Грција прва во Европа воведе задолжителна вакцинација, но само за граѓаните постари од 60 години, а Германија најавува од февруари
Во ЕУ се погласно се зборува за потребата од задолжителна вакцинација против ковид 19. Германија денеска веќе ги заостри мерките за невакцинираните граѓани, а објави одлука дека вакцинацијата ќе биде задолжителна од февруари.
Сојузната и провинциските влади во Германија се договорија за построги епидемиолошки мерки. Во продавниците, како и на културните и забавните настани, пристап ќе имаат само вакцинирани лица или оние кои прележале, изјави денеска канцеларката Ангела Меркел.
„За задолжителните вакцини ќе расправа и ќе гласа Бундестагот. Доколку бидат одобрени од парламентот, мерките би можеле да стапат на сила во февруари. 2022 година“,
вели Меркел.
Доколку се донесат овие мерки, невакцинираните нема да можат да одат во продавници. Така, во Германија се планира карантин за невакцинираните. Тоа го поддржува и Олаф Шолц, кој за неколку дена ќе ја преземе функцијата канцелар.
Претседателката на Европската комисија вчера за првпат најави можност за воведување задолжителна вакцинација против ковид-19.
Европската комисија нема овластување да наметне задолжителна вакцинација на земјите-членки, но може да ја препорача.
„Една третина од европската популација не е вакцинирана – тоа се 150 милиони луѓе. Тоа е многу. Не може секој да се вакцинира, на пример, многу мали деца или луѓе со посебни здравствени состојби, но огромното мнозинство може, и затоа мислам дека е разбирливо и соодветно да се води оваа дебата за задолжителната вакцинација во Европската унија“,
рече Урсула фон дер Лајен.
Грција прва во Европа воведе задолжителна вакцинација, но само за граѓаните постари од 60 години. Во Грција денеска е откриен првиот случај на новиот вид на коронавирус.
„Беше само прашање на време кога ќе биде откриен првиот случај. Што се однесува до преносливоста, сè уште не ги знаеме деталите и рано е да се извлечат заклучоци“,
изјави д-р Теоклис Заутис, директор на Институтот за јавно здравје на Грција.
Стравувајќи од петтиот бран, се повеќе земји во Европа размислуваат за заострување на мерките или за воведување задолжителна вакцинација.