Од СДСМ најавуваат дека има решенија за ваквата деструкцијата на Мицкоски, односно СДСМ и парламентарното мнозинство со сите демократски средства и деловнички можности ќе се спротивстави на блокадите и деструкциите од ВМРО-ДПМНЕ
Неодговорна, штетна и антидржавна е одлуката за блокада на Собранието од страна на ВМРО-ДПМНЕ и Христијан Мицкоски, реагираат од СДСМ на одлуката од опозициската партија од утре да започнат активна блокада на Собранието.
„Мицкоски, по нарачка на Никола Груевски, прави сè за државата да има дополнителни проблеми во време на најголема светска економска и енергетска криза, среќен единствено кога создава блокади. Сето ова Мицкоски и ВМРО-ДПМНЕ го прават во обид да ја покријат неспособноста на нивните градоначалници, но и криминалот во нивните редови потврден со признанија и ефективни судски пресуди. Собранието не е пазар туку законодавен дом во којшто се носат закони од интерес на граѓаните. Не може Мицкоски и ВМРО-ДПМНЕ да се пазарат кој закон ќе го блокираат а кој не. Сите закони блокирани од опозицијата се закони од интерес на државата и за добро на граѓаните и тоа е факт. Одговорни политичари не прават блокади, не уценуваат, не одмагаат, не се ситат кога на народот му е тешко. Туку спротивно на тоа, помагаат, работат, предлагаат, бараат решенија, нудат предлози“,
се вели во писмената реакција.
Од СДСМ најавуваат дека има решенија за ваквата деструкцијата на Мицкоски, односно СДСМ и парламентарното мнозинство со сите демократски средства и деловнички можности ќе се спротивстави на блокадите и деструкциите од ВМРО-ДПМНЕ.
„Нема да дозволиме граѓаните да страдаат заради лични или партиски хирови на Мицкоски. Парламентарното мнозинство е зголемено, стабилно е и функционално, а парламентарните избори ќе се одржат во редовниот термин, во 2024 година“,
велат од СДСМ.
Координаторот на пратеничката група на ВМРО-ДПМНЕ, Никола Мицевски, денеска по состанокот со пратеничката група на неговата партија и коалицијата „За обнова на Македонија“ соопшти дека е потврдена одлуката за активна блокада на Собранието.
Блокадата почнува од утре, а подразбира, како што рече, „попречување на штетните закони и политики“.