Најавената новогодишна кошничка ќе стартува на 15 декември и ќе трае до 15 јануари следната година, и со неа, како што информираа на прес-конференција минатата недела премиерот Христијан Мицкоски и министерот за економија и труд Бесар Дурмиши, се опфатени над 675 производи чии цени во овој едномесечен период треба да бидат намалени за 10 и повеќе проценти
Најавената мерка за воведување на т.н. новогодишна кошничка е уште една во низата манипулации на Владата на ВМРО-ДПМНЕ, реагираат од опозицискиот СДСМ. Оттаму додаваат дека новогодишната, исто како и есенската кошничка, нема да донесе намалени цени на производите.
„Со истите празни ветувања, власта се обидува да ги прикрие своите неуспеси да го заштити стандардот на граѓаните. Владата свесно остави простор на трговците да ги покачат цените на основните производи, за сега, со наводното намалување, граѓаните повторно да плаќаат исто или повеќе. Јајцата, кои неодамна чинеа 75 денари, сега се продаваат за 90 денари. Зејтинот поскапе од 82 на 89 денари, а цената на кашкавалот достигна речиси 500 денари за килограм – речиси 70 денари повеќе од претходно. Ова не е грижа за граѓаните, ова е свесна манипулација за заштита на интересите на трговците, додека народот едвај врзува крај со крај. Додека пензионерите, работниците и семејствата со минимални приходи се соочуваат со дилемата дали да купат храна, да платат сметки или лекови, функционерите на ВМРО-ДПМНЕ уживаат во удобноста на високи плати и луксуз“,
се наведува во соопштението на СДСМ.
Најавената новогодишна кошничка ќе стартува на 15 декември и ќе трае до 15 јануари следната година, и со неа, како што информираа на прес-конференција минатата недела премиерот Христијан Мицкоски и министерот за економија и труд Бесар Дурмиши, се опфатени над 675 производи чии цени во овој едномесечен период треба да бидат намалени за 10 и повеќе проценти.
Промовирајќи ја кошничката, Мицкоски кажа дека листата на производи чии цени треба да бидат намалени е скроена, односно понудена во договор со стопанските комори, производителите, трговците и дистрибутерите.
Бидејќи станува збор за, како што кажа, консензуално решение, а не интервентна мерка на Владата, премиерот рече дека нема да има казнување, туку само мониторинг за тоа дали сите производи ќе бидат означени со соодветните налепници за да можат да бидат препознатливи за граѓаните.
На забелешка на новинарите дека во листата на производи во новогодишната кошничка има производи чии цени во изминатиов период се зголемени и дали поради ова ќе има механизми со кои тоа ќе се контролира или евентуални казни за производителите и трговците, министерот за економија и труд Дурмиши рече дека ова не е владина одлука, туку дека цените се понудени од трговците, а доколку има зголемување, тоа ќе го утврди Државниот пазарен инспекторат (ДПИ).
Надоврзувајќи се на него, премиерот Мицкоски рече дека станува збор за добра забелешка и обраќајќи му се на директорот на Државниот пазарен инспекторат, Влатко Стојкоски, му предложи веднаш да излезе и да ги види цените во маркетите.