Обвинителството денеска соопшти дека е донесена наредба за спроведување истражна постапка против двајца хрватски државјани и еден државјанин на Северна Македонија, висок владин функционер, за кој медиумите објавија дека е генералниот секретар на Владата Мухамед Зеќири
Предметот за истрагата за проневера, која е покрената против генералниот секретар на Владата Мухамед Зеќири и уште двајца хрватски државјани, Обвинителството за организиран криминал го доби во втората половина на 2021 година, вели обвинителката Вилма Русковска во изјава за „Слободен печат“.
„Истрагата се водеше од Министерството за внатрешни работи, а Обвинителството го доби случајот во втора половина на 2021 година. Оттогаш надлежниот обвинител издаде повеќе наредби за собирање докази и во текот на вчерашниот ден стигна и последното известување, по што надлежниот обвинител донесе наредба за спроведување истрага и предлог за определување мерка притвор за осомничените. По таа мерка, Судот ќе одреди како ќе постапува понатаму. Имаме податок за тоа каде се парите. Осомничените хрватските државјани, според нашите информации, не се наоѓаат во државава, но ние ќе стапиме во контакт со колегите од Хрватска, ќе ги доставиме доказите до нив, па доколку се согласат да го преземат гонењето, нивното понатамошно процесирање ќе биде во Хрватска,“
вели Рускоска.
Обвинителството денеска соопшти дека е донесена наредба за спроведување на истражна постапка против двајца хрватски државјани и еден државјанин на Северна Македонија.
Во соопштението се наведува дека во периодот од април 2021 до јануари 2022, со искористување на својата службена положба генерален секретар на Владата, првоосомничениот без спроведување на соодветна постапка за јавна набавка, склучил договор за консултантски услуги со правно лице во што со умисла му помогнале осомничените хрватски државјани. Со преземените дејствија, осомничените за консултантската куќа од Хрватска прибавиле значителна противправна имотна корист во вкупна вредност од 940 000 евра на штета на буџетот.