„Од страна на Јавното обвинителство на РСМ не се вршеше надзор врз целокупната моја работа или на колешките, туку надзор исклучиво по овој предмет и по овој предмет ние добивме укажувања и сметам дека апсолутно е спротивен на законот. Законот е таков каков што е и мораме таков да го применуваме. Ако излеземе од рамките на кој било закон се создава многу лоша пракса, и сметам дека овој член и став се донесени исклучиво да се обезбеди професионално постапување на кој било јавен обвинител“, изјави Русковска
Шефицата на Основното јавно обвинителството за гонење на организиран криминал и корупција Вилма Русковска денеска до Советот на јавни обвинители поднесе жалба против одлуката на Јавниот обвинител Љубомир Јовески да ја суспендира додека трае постапката за кривичната пријава поднесена против неа од страна на директорот на Финансиска полиција, Арафат Муареми.
Во таа насока, Русковска кажа дека ова не е нејзина, туку суспензија на павото и правдата.
Таа кажа дека ги побива наводите во решението, но не објасни што навела во жалбата и рече дека најпрво членовите на Советот треба да ја видат жалбата и да бидат запознаени со истата, а потоа и јавноста.
„Ова не го сметам за суспензија на Вилма Русковска, туку за суспензија на правото и суспендирање на правдата. Без разлика што имаше соопштение дека предметите ќе продолжат со несмален интензитет после ова мене што ми се случи не верувам дека кој било колега сериозно ќе продолжи да постапува по истите“,
изјави Русковска.
Прашана што ќе биде со предметот за кој беше извршен претресот во Управата за финансиска полиција, Русковска рече дека не знае, и нагласи дека веќе почнала со сослушување на сведоци, но поради суспензијата тие морало да се одложат.
„Во решението за моја суспензија е наведено дека предметите треба да ги предадам на колешката која е одредена согласно годишниот распоред, истата од 15-ти се наоѓа на годишен одмор и предметите не можев да ги распределам, а таа не може да ги работи бидејќи и против нејзе има дисциплинска постапка“,
изјави Русковска.
За тоа до какви докази дошле со претресот во Управата за финансиска полиција, Русковска рече дека не дошле до докази зашто не им биле доставени сите документите кои ги барале.
„Не дојдовме до докази зашто ние со претресот ги набројавме точно кои предмети треба да ни бидат доставени. Се работи за околу 250 – 300 предмети од кои ни беа доставени 30-ина, повеќето од кои воопшто не ги баравме. Сè уште нема доставено скоро ниту еден предмет од тие кои ги имаме побарано“,
изјави Русковска.
Обвинителката посочи дека согласно Законот за кривична постапка, имаат право да бараат казнување на институцијата и казнување на одговорното лице и најави оти тоа и ќе го сторат.
Во однос на предлогот за поведување дисциплинска постапка против неа, Русковска рече дека од Комисијата сè уште не и било побарано да се произнесе и посочи дека таа постапка трае подолго, а нагласи и дека ниту јавниот обвинител на РСМ, ниту јавните обвинителства можат да даваат насоки и укажувања по конкретен предмет.
„Од страна на Јавното обвинителство на РСМ не се вршеше надзор врз целокупната моја работа или на колешките, туку надзор исклучиво по овој предмет и по овој предмет ние добивме укажувања и сметам дека апсолутно е спротивен на законот. Законот е таков каков што е и мораме таков да го применуваме. Ако излеземе од рамките на кој било закон се создава многу лоша пракса, и сметам дека овој член и став се донесени исклучиво да се обезбеди професионално постапување на кој било јавен обвинител“,
изјави Русковска.
За претресот на 18 јули во Управата за финансиска полиција, директорот Арафат Муареми на 8 август годинава поднесе кривична пријава до Основното јавно обвинителство Скопје против сите обвинители за кои тие сметаат дека постојат основи на сомнение за сторени кривични дела при постапување.
Републичкиот јавен обвинител, Љубомир Јовески, согласно Законот за јавното обвинителство, донесе Решение за оддалечување од функцијата на шефицата на Основното јавно обвинителство за гонење на организиран криминал и корупција Вилма Русковска додека трае кривичната постапка поведена по поднесена кривична пријава против неа.
Јовески, како што информираа од ЈОРСМ, поднел предлог за поведување дисциплинска постапка за утврдување одговорност на тројца јавни обвинители, за кои постои сомнение дека намерно и неоправдано направиле крупна професионална грешка со што сториле тешка дисциплинска повреда.