Предметот засега е во фаза на предистрага, во чии рамки истражители од Обвинителството вчера го посетиле Министерството за внатрешни работи и од два сектора ја подигнале документацијата поврзана со случајот
„360 степени“ кон крајот на декември 2021 г. објави дека станицата за технички преглед „Виа комерц“ во село Глумово (Општина Сарај) била затворена три дена по трагедијата на автобусот на „Беса транс“ во Бугарија, иако пропустите во нејзината работа биле откриени повеќе од три месеци претходно
Во телефонски повик до „Виа комерц“, пак, во кој се претставивме како заинтересирани потрошувачи, ни кажаа дека техничкиот преглед сега работи, но со друго име. Дали оваа околност е нов случај сам за себе?
Основното јавно обвинителство за гонење на организиран криминал и корупција (ОЈОГОКК) испитува зошто во Министерството за внатрешни работи со месеци го чувале во фиока решението за привремена забрана за работа на станицата за технички преглед „Виа комерц“, во која на последна контрола бил и автобусот на „Беса транс“ што изгоре во Бугарија.
„360 степени“ дознава дека обвинителството со кое раководи Вилма Русковска отворило предмет, кој засега е во фаза на предистрага. Според нашите сознанија, истражители од Обвинителството вчера го посетиле Министерството за внатрешни работи и од два сектора ја подигнале документацијата поврзана со случајот. Се постапува по кривична пријава од анонимни поднесувачи (група граѓани), вели нашиот извор.
Што откри „360 степени“
„360 степени“ кон крајот на декември 2021 г. објави дека станицата „Виа комерц“ била затворена веднаш по трагедијата во Бугарија, иако пропустите во работата биле откриени повеќе од три месеци претходно.
Решението за забрана за работа, кое „360 степени“ тогаш го стави на увид на јавноста, е потпишано од министерот за внатрешни работи Оливер Спасовски на 26 ноември 2021 г. (три дена по несреќата на автобусот на „Беса транс“ во Бугарија).
Од документот се гледа дека неправилности во работата на станицата за технички преглед во село Глумово, Општина Сарај, биле откриени уште на 12 август 2021 г., но од засега необјаснети причини, министерот Спасовски не потпишал решение за привремена забрана за работа – до отстранување на пропустите, иако таков предлог бил изготвен од соодветните служби во Бирото за јавна безбедност.
Во меѓувреме, на 5 октомври 2021 г., автобусот на „Беса транс“ што изгоре во Бугарија и со себе однесе 45 животи, поминал на технички преглед токму во оваа станица.
Од решението може да се види дека при надзорот на работата на станицата што надлежни служби од МВР го извршиле на 12 август, било утврдено дека не се водат потребните регистри на возила на кои им е извршен технички преглед, но и дека во контролата учествуваат нестручни лица.
„Констатирано е дека во постапката на технички преглед … врши проверка … и лицето Е.Д. …, кој е ученик во АСУЦ ’Боро Петрушевски’ …, кој во станицата е дојден со договор за феријална практика. Исто така, возилата при вршење на технички преглед се управуваат од управителот на правното лице Ј.Н., кој не е контролор во станицата за технички преглед и не ги исполнува условите за контролор…“,
пишува во решението на МВР.
Во записникот понатаму се констатира:
„На овој начин … се овозможува во сообраќајот на патиштата да учествуваат технички неисправни возила, односно возила кои може да претставуваат опасност по безбедноста на сообраќајот на патиштата“.
По пропустите утврдени на 12 август, надлежни лица во Бирото за јавна безбедност на 25 август изготвиле предлог за забрана за работа на станицата за технички преглед. Но, Спасовски не го потпишал предлогот за забрана за работа, па станицата за технички преглед продолжила со работа. На 5 октомври во станицата поминал технички преглед и автобусот на „Беса транс“ кој изгоре во Бугарија на 23 ноември 2021 г.
Веднаш по несреќата, на 26 ноември, Спасовски става потпис на решение за забрана за работа на станицата, давајќи и рок од 30 дена за отстранување на пропустите. Интересен факт е дека истиот ден кога го потпишува решението, Спасовски држи прес-конференција на која воопшто не ја информира јавноста за тоа.
ОЈО Скопје веќе го испитува случајот
По објавата на „360 степени“, реагираше Државната комисија за спречување на корупција (ДКСК) која го повика јавното обвинителство да ја прошири предистрагата за случајот со „Беса транс“, чиј автобус на 23 ноември изгоре на автопатот во Бугарија.
„Со оглед дека во ОЈО Скопје веќе има предмет за случајот со ‘Беса транс’ и се вршат предистражни дејствија, сметаме дека најрационално е да се продлабочи предистрагата во овој правец“,
рече претседателката на Антикорупциската комисија, Билјана Ивановска.
Од ОЈО Скопје тогаш кажаа дека во рамки на постапувањето ги испитуваат и околностите во кои била затворена станицата за технички преглед во која поминал автобусот.
„Во рамките на постапката на ОЈО Скопје поврзана со работата на правниот субјект ‘Беса транс’ и постапувањето на другите надлежни органи, се испитуваат сите околности, вклучувајќи ги и тие што ги наведувате. Притоа, интензивно се преземаат дејствија за утврдување на фактите. Но, со цел да не и се наштети на постапката, во оваа фаза не сме во можност да споделиме повеќе детали,“
информираа од ОЈО Скопје.
МВР молчи, станицата работи со ново име
Зошто забраната за работа на станицата е издадена веднаш по несреќата во Бугарија, а не три и пол месеци претходно кога бил изготвен таков предлог од надлежните служби? И покрај неколкуте наши обиди да добиеме објаснување од МВР во текот на објавувањето на сториите за случајот, Министерството не одговори на ниту едно прашање на „360 степени“ поврзано со темата.
Со решението за привремена забрана за работа од 26 ноември, на „Виа комерц“ и беше даден рок од 30 дена да ги отстрани констатираните пропусти, или во спротивно, да и биде одземено овластувањето за вршење технички преглед.
Во МВР прашавме и до каде е евентуалното отстранување на пропустите, дали станицата на „Виа комерц“ почна со работа или, пак, е можно да и го одземат овластувањето за технички преглед, но не добивме одговор.
Во телефонски повик до „Виа комерц“, пак, во кој се претставивме како заинтересирани потрошувачи, ни кажаа дека техничкиот преглед сега работи, но со друго име. Дали оваа околност е нов случај сам за себе?
This project was funded through a U.S. Embassy grant. The opinions, findings, and conclusions or recommendations expressed herein are those of the implementers/authors and do not necessarily reflect those of the U.S. Government.
Овој проект е поддржан од Амбасадата на САД. Мислењата, откритијата и заклучоците или препораките изнесени овде се на имплементаторите/ авторите, и не ги одразуваат оние на Владата на САД.
Ky projekt është i mbështetur me grant nga Ambasada e SHBA-ve. Mendimet, zbulimet dhe konkluzionet ose rekomandimet e paraqitura këtu janë të implementuesve/autorëve dhe nuk i reflektojnë domosdoshmërisht ato të Qeverisë së SHBA-ve.