Според неговата оценка, демократите воделе успешна кампања и најави дека ќе ги прифати изборните резултати
Американскиот претседател Доналд Трамп им честита на демократите за победата на изборите за Конгресот, на кои неговата Републиканска партија претрпе пораз.
Порача дека очекува соработка со нив во интерес на земјата, но истовремено предупреди дека ќе го користи правото на вето доколку не се постигне договор.
Во телефонски разговор за Си-би-ес њуз, Трамп рече дека се надева оти демократите ќе сакаат да соработуваат со него, но истакна дека располага со „целосно право на вето“.
„Мојата порака е – им честитам на демократите и се радувам на соработката со вас за доброто на нашата земја“,
изјави Трамп.
Посочи дека познава многу демократи и дека верува оти ќе успеат да постигнат договор за одредени прашања.
„Имам целосно право на вето и сигурен сум дека ќе успееме да се договориме. Мислам дека ќе сакаат да соработуваат со мене. Во спротивно, едноставно би ставил вето на сè, а тоа нема да го сакаат“,
рече американскиот претседател.
По објавувањето на прелиминарните резултати, тој во објава на Трут соушл објави фотографија од црвен качкет на кој е испишан зборот „Вето“.
Трамп претходно, пред затворањето на избирачките места, во разговор за истата телевизија говореше за можноста демократите да ја преземат контролата врз Конгресот.
Според него, републиканците изгубиле затоа што неговото име не било на гласачкото ливче. Дел од гласачите, додаде дека не биле задоволни од кандидатите, а некои од нив не биле негови блиски соработници, поради што поддржувачите на Републиканската партија останале дома.
Сепак, во интервју за Фокс њуз, тој рече дека е „малку изненаден“ од изборниот пораз на неговата партија.
Потоа им оддаде признание на демократите, оценувајќи дека „завршиле добра работа“ и „се бореле жестоко“, порачувајќи дека ќе ги прифати изборните резултати.
Според прелиминарните изборни резултати, демократите победија на меѓуизборите во Соединетите Американски Држави (САД) и ќе го преземат мнозинството и во Претставничкиот дом и во Сенатот на американскиот Конгрес од јануари, со што ќе ја добијат контролата врз двата дома на парламентот.