Гаранција се нуди во однос на околноста опасност од бегство, но во случајот на Рашковски, покрај ова, второстепениот суд смета дека сѐ уште постои опасност тој да влијае на сведоците или на истрагата
Ексгенералниот секретар на Владата, Драги Рашковски, од ефективен притвор во затворот „Скопје“ во Шуто Оризари заминува во куќен притвор. Одлуката за замена на мерката Апелација ја донела денеска и веднаш ја испратила до Основниот кривичен суд во Скопје, потврдуваат за „360 степени“ од второстепениот суд.
Решението за замена на притворот стигнало и во затворот во Шутка од каде што велат дека очекуваат полициски службеници набрзо да пристигнат и да го спроведат Рашковски во домот каде што ќе го издржува куќниот притвор.
Понудената гаранција од 500 илјади евра, за која објавивме, не била разгледувана. Како што велат од Апелацискиот суд во Скопје, гаранција се прифаќа кога се укинува притворот, без разлика дали е ефективен или куќен, па со оглед дека е донесена одлука Рашковски да замине во куќен притвор, апелациските судии воопшто и не ја разгледувале.
Гаранција се нуди во однос на околноста опасност од бегство, но во случајот на Рашковски, покрај ова, второстепениот суд смета дека сѐ уште постои опасност тој да влијае на сведоците или на истрагата.
Одлуката значи и дека апелациските судии не се согласиле со проценката од Вишото јавно обвинителство за кое информиравме дека се согласило ексгенералниот секретар на Владата да излезе од притвор со гаранција.
Зошто се гони Рашковски?
Драги Рашковски беше генерален секретар на Владата од 2017 до 2020 година. Во актуелната влада, на таа позиција го наследи Мухамед Зеќири, а Рашковски доби позиција во премиерскиот кабинет која досега не беше позната за јавноста – секретар во кабинетот.
На почетокот на март годинава, „360 степени“ објави сторија дека Драги Рашковски како генерален секретар купил софтвер за автоматско казнување на сообраќајни прекршоци кој ниту некој му го барал ниту, пак, некој го користи. Министерството за внатрешни работи, кое единствено може да казнува во сообраќајот, беше децидно дека не побарале такво нешто од Рашковски ниту имаат намера да го користат тоа што го купил.
Дополнителните новинарски истражувања на „360 степени“ покажаа дека софтверот купен за околу 81 000 евра, всушност, во многу наликува на патент кој Драги Рашковски како иноватор го регистрирал во Државниот завод за индустриска сопственост. Понатаму, откривме и дека софтверот бил платен непосредно пред изборите на 15 јули уште пред да биде тестиран, иако според тендерската документација требало да биде обратно – прво успешен тест, па потоа плаќање.
На новинарските истражувања реагираше Обвинителството за гонење организиран криминал и корупција, кое отвори предистражна постапка на 18 март. По еден месец предистрага, на 16 април Рашковски беше задржан, а против него Обвинителството отвори истражна постапка. Обвинителството бараше затворски притвор, но првично Рашковски доби куќен притвор од Кривичниот суд во Скопје. Дури во втор степен беше одобрено барањето на ОЈО за гонење на организиран криминал Рашковски да се брани од Шутка, поради опасност од влијание врз сведоци.
По речиси еден месец поминати во притвор, Обвинителството кое го води Вилма Русковска отвори уште една истрага против Драги Рашковски. Во своето соопштение до јавноста тие кажаа дека станува збор за уште еден тендер додека бил генерален секретар, но не понудија многу детали. По „трошките“ од соопштението, „360 степени“ откри дека станува збор за јавна набавка на „систем за биометриска идентификација“ со државни пари во 2019 година. Како и во првиот случај, овој систем никој не го барал од Рашковски, никој не го користи ниту, пак, знае каде е. И повторно, тоа што Рашковски го купил како генерален секретар во 2019 година веќе го имал патентирано како изум, овој пат во 2013 година.
Обвинителството сепак не застана таму, туку го осомничи Рашковски и за друга злоупотреба – дека му плаќал месечна сума од 80 000 денари барем на еден хонорарец, кој потоа бил задолжен да му враќа дел од таа сума.