Во низата сопартијаци и блиски соработници кои му изразуваат поддршка на Христијан Мицкоски се вклучи и неговиот избор за техничи министер за труд и социјална политика, Рашела Мизрахи.
Таа, за разлика од останатите, освен пофалби за својот лидер упатува и критика за сите што се сомневаат во неговиот патриотизам.
„Зарем му беше лесно на Христијан Мицкоски изминативе три години?Дали било што во оваа битка направи за себе или само стоеше храбро за партијата и Македонија!? Зарем со еден збор навреди или повреди било кого или остана интелектуалец и Господин и покрај поројот гадости со кој се обидуваа да го урнат и неговото и патриотското и партиското и Македонското достоинство!? И сѐ уште и до крај тој човек е подготвен на саможртва за својот народ и татковината. А кој не мисли така и тоа не го гледа, не ни мисли и е слеп при очи, или сака да ја игра онаа човек на човека душман“,
вели Мизрахи.
Идната пратеничка од редовите на ВМРО-ДПМНЕ оценува дека Мицкоски ја презел партијата во нејзините најтешки мигови и ја кренал од пепелта.
„Во тешкото се бројат јуначките срца. И само злонамерните ќе кажат лош збор за човекот со срце и храброст да застане на чело на пеплосаното и разочарано ВМРО со бела ,,палата” на прашина и тишина пред три години. Старите велат: ,,Не суди на никого додека не изодиш пат во неговите чевли”,
појаснува Мизархи.
Таа, остро им се спротивставува и на сите оние кои сметаат дека Мицкоски е заинтересиран единствено да опстане на позицијата партиски лидер.
„А на сите оние кои мислат дека сето ова е за фотелји, јасно и гласно кажувам: Земете ги, носете ги…Чуму фотелји ако немам држава!!“,
вели Мизрахи.
На крајот од својата објава, Мизрахи му упатува и лична порака на својот лидер.
„Претседателе за Вас се зборовите на големиот Винстон Черчил:,Во војната решителност. Во поразот пркос. Во победата великодушност. Во мирот: добра волја!” Главата Горе Македонијо!“,
е пораката на Мизрахи.
Освен Мизрахи, пораки со поддршка на Мицкоски упатија и пратеникот Антонијо Милошоски и поранешниот висок функционер на ВМРО-ДПМНЕ, Иван Соколов.
Пред седниците на Извршниот и Централниот Комитет, тоа го сторија и десетина членови на партиското раководство и идни претставници на ВМРО-ДПМНЕ во Собранието.