Од ЈП „Водовод и канализација“ велат дека веќе е започнато полнењето на магистралниот водовод. Се очекува притисокот да се стабилизира за неколку часа
Се работи на последната постапка, реконструкција на затворачот Ф700 на улица „Никола Парапунов“
При крај се работите за санација на, како што велат од ЈП „Водовод и канализација“, задоцнетата модернизација на главниот градски водовод. Од синоќа, од околу 22 часот, јавното претпријатие работи на неколку точки на магистралниот водовод, чија цел е намалување на загубите и подобрување на водоснабдувањето пред сè во општините Карпош и Ѓорче Петров.
„Операција се движи во рамки на предвиденото и очекувано е да заврши во предвидениот рок со вкупно време од помалку од 15 часа, во кои најмногу време се одвојува за празнење и полнење на магистралниот водовод. Полнењето веќе е започнато и се очекува притисокот да се стабилизира за неколку часа“,
соопштија од ЈП „Водовод и канализација“.
Од јавното претпријатите велат дека со затворање на главниот градски цевковод Ф1600мм по должина на линијата на потегот од кружниот тек во Ѓорче Петров, до раскрсницата на булеварот „Партизански одреди“ со ул. „Никола Парапунов“, веќе се завршени следните интервенции:
- По должина на траса по „Партизанска“ од кружен тек Ѓорче Петров до хотел „Карпош“, каде се променети 5 воздушни вентили и 5 затворачи за истите на Ф200 поврзани на цевководот Ф1600;
- Реконструиран е затворач Ф700 на бул. „Партизански одреди“ со ул. „Никола Парапунов“;
- Променет е затворачот на Ф400 на кружниот тек Порта Влае;
- Реконструиран е затворач Ф600 на мостот „Обединети нации“ и
- Реконструиран е затворач Ф500 на ул. „Никола Парапунов“.
Во овој момент во фаза на завршување е последната постапката за реконструкција на затворачот Ф700 на ул. „Никола Парапунов“, која се изведува независно од останатите и за која не е неопходно затворање на главниот довод, велат од ЈП „Водовод и канализација“.
На извршувањето на активностите, на кои се работеше цела ноќ, ангажирани се повеќе од 160 стручно вработени.
„Апелираме до сите јавни чинители да ги поддржат нашите вработени во оваа исклучително тешка акција која бара високо ниво на стручност и техничка подготвеност, а воедно и до јавноста да не потпаѓа под изнесувањето информации од нестручни лица со цел да се предизвика страв и паника кај граѓаните. За сите прашања во врска со статусот на операцијата „Водовод и канализација“ – Скопје ќе бидат достапни за одговори во текот на целото времетраење на санацијата“,
соопштија од ЈП „Водовод и канализација“.