Покрај обвинувањата за воени злосторства од Украина и од западните земји, за случувањата во Буча истрага отвори и Меѓународниот кривичен суд чиј обвинители минатата недела го посетија градот
Почесна титула за „херојство“ од рускиот претседател Владимир Путин доби 64-та руска моторизирана пешадиска бригада која е обвинета за воено злосторство во украинскиот град Буча.
Како што соопшти Кремљ, Путин потпишал декрет со кој ги одликува членовите на бригадата за нивното „херојство, истрајност, одлучност и храброст“.
„Одлучните и вешти акции на членовите на бригадата за време на специјалната воена операција во Украина се пример за извршување на воената задача, храброст, решителност и голем професионализам“,
напишал Путин во пораката до војниците.
Кремљ не прецизира каде се тие сега, која е нивната мисија или каде се распоредени.
Станува збор за бригадата која Киев особено ја обвини за масакрот врз цивилите во Буча, што беше откриен по повлекувањето на руските војници од градот, на 30 март. Според украински извори, во Буча биле убиени околу 300 цивили, а сликите од овој град со мртви тела по улиците и масовни гробници на почетокот на април го загрозија светот.
Покрај обвинувањата за воени злосторства од Украина и од западните земји, за случувањата во Буча истрага отвори и Меѓународниот кривичен суд чиј обвинители минатата недела го посетија градот.
Главниот обвинител за воени злосторства, Карим Кан, кој го предводеше тимот истражители, тогаш изјави дека имаат разумни основи да веруваат дека се вршат воени злосторства што се во јурисдикција на Меѓународниот кривичен суд.