Според Бислимоски, сега прво треба да се види како ќе влијае воведувањето на блок тарифите за цената на струјата кај домаќинствата, а исто така, објаснува тој, со оглед дека се повеќе граѓани инвестираат во енергетска ефикасност, тогаш ќе има и помала потрошувачка што ќе значи дека на ЕСМ ќе ѝ останат вишоци кои ќе може да ги продава и да го покрие негативното салдо
Претседателот на Регулаторната комисија за енергетика (РКЕ), Марко Бислимоски, е против поскапување на струјата за домаќинствата од Нова година, како што претходно најавија владини претставници.
Во интервју за Радио Слободна Европа (РСЕ) тој вели дека не треба да се брза туку прво да се направат анализи.
„Јас сум противник да има поскапување на електричната енергија. Прво треба да направиме анализи, да видиме како се обезбедуваат потребите на малите потрошувачи и на домаќинствата на регулираниот пазар и како е планот догодина да бидат обезбедени. Кога имаше потреба да се зголеми цената на електричната енергија поради надворешни влијание, пред сè поради зголемена цена на увоз и реално ЕСМ пред две години имаше цена од 34 евра за мегаватчас, што е една неодржлива ситуација. Регулаторната комисија за енергетика ја зголемуваше цената на електричната енергија, не сме бегале од одговорност, но сега треба малку да застанеме, да направиме анализи што се случило во 2022, што е планот за 2023, а потоа да се носат соодветни одлуки“,
вели Бислимоски за РСЕ.
Според него, сега прво треба да се види како ќе влијае воведувањето на блок тарифите за цената на струјата кај домаќинствата. Дополнително, објаснува тој, со оглед дека се повеќе граѓани инвестираат во енергетска ефикасност, тогаш ќе има и помала потрошувачка што ќе значи дека на ЕСМ ќе ѝ останат вишоци кои ќе може да ги продава и да го покрие негативното салдо.
„Верувам дека голем број домаќинства инвестираа и во енергетска ефикасност и во начини на греење коешто се обезбедува со помала потрошувачка на електрична енергија и таа намалена потрошувачка ќе му обезбеди и на ЕСМ, како компанија којашто целосно ги обезбедува потребите да има вишоци на електрична енергија коишто ќе ги продава на слободниот пазар по повисоки цени. Па така, доколку остварувал минуси на регулираниот пазар, со тоа што би го продавал на слободниот пазар би си ги покрил тие минуси. Затоа велам, треба да се направат анализи, да ја нагазиме топката малку и да видиме каде ќе тераме. Ако се преземе обврска дека ќе се обезбеди од домашно производство, вклучувајќи и ТЕЦ Неготино, да се обезбеди од домашно производство“,
вели Бислимоски.
Досега, директорот на ЕСМ, Васко Ковачевски, најави дека ќе има зголемување на цената за струјата од Нова година, но оти ќе се прават напори тоа да биде минимално.
„Не го кажувам само јас тоа, тоа го кажуваат сите во Европа. Цените на електричната енергија ги формираат цените на енергенсите. Со оглед на тоа што имаме зголемени трошоци на производство и зголемени цени на енергенси, имаме дополнителни количини на електрична енергија што треба да ги произведеме, дел можеби треба да се набават, моја претпоставка е дека очекувано е да има зголемување на цената на електрична енергија, но сега ги правиме сите напори за тоа да биде мало, минимално или благо покачување. И еден денар да биде, покачување е. И десет денари е покачување и сто денари е покачување“,
рече Ковачевски во гостувањето во емисијата „360 степени“ на 16 септември годинава.
И министерот Бектеши пред околу една недела зборуваше за минимално поскапување, иако првично велеше дека струјата нема да поскапи.
„Ако се исполни планот за производство од страна на ЕСМ до крајот на оваа година, не очекувам да има големо зголемување на цената на електричната енергија од 1 јануари следната година“,
рече Бектеши во емисијата „360 степени“ на 4 ноември годинава.