Роверот на американската вселенска агенција НАСА „Perservence“ (упорност), кој по седум месеци патување низ вселената синоќа слета на Марс, ја испрати и првата фотографија.
„Мојот прв поглед од мојот вечен дом“, напишаа од НАСА објавувајќи ја фотографијата.
Роверот се смести во кратерот наречен Језеро, именуван по општина во Босна и Херцеговина. Областите во близина на кратерот се именувани по реките што течат низ БиХ, но и Хрватска. Така, веднаш до местото за слетување се наоѓа долината Неретва, која е всушност исушено корито на древна река. Југозападно од кратерот Језеро се наоѓа долината Уна, а на север е долината Сава.
Станува збор за депресија со широчина од 45 километри, лоцирана во северната хемисфера на Марс. Токму на ова место се смета дека имало огромно езеро пред една милијарда години. Тоа е причината што роверот слета таму, бидејќи верувањата се дека каде што имало вода постои можност да имало и живот. Се очекува најмалку во следните две години да се спроведува испитување со дупчење во почвата и карпите за да се бараат докази дали во минатото имало живот на оваа планета. Примероци од почвата на Марс треба да бидат испратени на Земјата со идни мисии.
