Она што повеќе ги загрижува американските власти, како што пишува весникот Вашингтон пост се случаите на заразени со коронавирус, а за кои нема историја на патување во земји кои се погодени со овој вирус или контакт со заразени лица
Во САД е потврден првиот смртен случај од новиот коронавирус.
Властите во државата Вашингтон потврдија дека едно лице починало како последица на вирусот, но не соопштија други детали, освен дека пациентот бил од област во близина на Сиетл. Повеќе информации се очекуваат во текот на денот.
Со денешните четири нови случаи, во САД вкупно 19 лица се заразени со новиот вирус.
Но, она што повеќе ги загрижува американските власти, како што пишува весникот Вашингтон пост се случаите на заразени со коронавирус, а за кои нема историја на патување во земји кои се погодени со овој вирус или контакт со заразени лица. Такви досега има три случаи и никој не бил во меѓусебен контакт.
Вакви случаи има и Италија, каде има двајца заболени коишто не патувале, немале контакт со претходно заболени, ниту со некој што патувал или бил во контакт со заболени од Кина. Примерот го обелодени вчера министерот Филипче во интервју за „360 степени“. Вели дека е вклучена и СЗО и дека се очекуваат првични сознанија околу ова.