Овие две мерки, според социјалдемократите, ќе имаат директен ефект врз намалување на цените не само на горивата, туку и на потрошувачката кошничка и вкупното ниво на цените
ДДВ за горивата да се намали од 18 на 5 проценти, а за 50 отсто да се намалат и акцизите – бараат од опозицискиот СДСМ, откако цените на горивата изминатиов период повторно значително се зголемија. Овие две мерки, според социјалдемократите, ќе имаат директен ефект врз намалување на цените не само на горивата, туку и на потрошувачката кошничка и вкупното ниво на цените.
„Цените на горивата се до плафон, а од вчера дизелот е над 100 денари за литар. Само за шест месеци цената на дизелот порасна за 43 отсто. Ова е нов удар врз стандардот на граѓаните, но Владата на Мицкоски не презема ништо. Нема намалување на ДДВ. Нема намалување на акцизата. Нема мерки за заштита на стандардот“,
рече на денешната прес-конференција Наташа Поповиќ – членка на Извршниот одбор на СДСМ.
Реакцијата на опозиционерите следува откако претходно вчера, премиерот Христијан Мицкоски на темата за покачувањето на цените на нафтените деривати рече дека Владата има јасен план и стратегија, но не кажа конкретно кога и какви мерки ќе бидат преземени.
Ударот по џебот на граѓаните, велат од СДСМ, не завршува само на бензинските пумпи, туку се преточува и на поскап транспорт, поскапо производство, поголеми трошоци за земјоделците и нов раст на цените на храната.
„Половина од семејниот буџет на македонските граѓани веќе оди за храна и пијалаци, потрошувачката кошничка е речиси 70 000 денари, а платите стагнираат. Секој нов денар на лебот, млекото, зеленчукот и овошјето директно удира врз семејната трпеза. Животниот стандард на граѓаните се намалува, а Владата не презема ништо“,
коментираат од СДСМ.
Инаку, според последната одлука на РКЕ, литар еуросупер БС-95 се продава за 93 денари, еуросупер БС-98 чини 95 денари за литар, а литар дизел се продава за 101,5 денари.