Битиќи ја критикуваше и пресметката на Министерството за економија, кое објави просечна потрошувачка кошница за август од 58 475 денари – износ за кој вели дека е за 10 200 денари понизок од оној на синдикатот
Пратеникот од редовите на СДСМ, Фатмир Битиќи, на денешната собраниска седница посветена на пратенички прашања упати критики до Владата за економските политики и падот на животниот стандард. Во отсуство на министерката за финансии Гордана Димитриеска-Кочоска, тој побара писмен одговор за тоа каква финансиска алтернатива се предлага откако парламентарното мнозинство го одби предлогот на СДСМ за зголемување на минималната плата на 600 евра.
Битиќи истакна дека граѓаните секој месец се соочуваат со сè поголем јаз меѓу примањата и трошоците за живот, а податоците за синдикалната минимална кошница јасно укажуваат на постојано слабеење на куповната моќ.
„Во ноември 2023 година беа потребни 2,2 минимални плати за покривање на синдикалната кошница, додека во септември 2026 година се потребни 2,7 минимални плати, односно дури 3,26 минимални плати ако се пресмета и киријата. Септемвриската кошница од 69 432 денари бара 2,7 минимални плати од 26 046 денари. Тоа значи дека две минимални плати оставаат недостиг од 17 340 денари месечно за основните трошоци, и тоа без кирија. Само храната и пијалаците чинат 25 259 денари, што е 97 отсто од една минимална плата“,
нагласи Битиќи.
Пратеникот предупреди дека забавувањето на општата инфлација не значи дека цените се вратиле на претходното ниво или дека граѓаните го вратиле изгубениот стандард. Тој посочи дека во 2025 година храната поскапела за 5,2 отсто што е 1,1 процентен поен над тогашната општа инфлација од 4,1 проценти, додека во септември годинава, и покрај инфлацијата од 2,7 отсто, храната дополнително поскапела за 0,5 проценти за само еден месец.
Битиќи ја критикуваше и пресметката на Министерството за економија, кое објави просечна потрошувачка кошница за август од 58 475 денари – износ за кој вели дека е за 10 200 денари понизок од оној на синдикатот.
„Министерството за економија одлучи да прави ‘розови’ математики во јавноста. И според нивната просечна потрошувачка кошница, две минимални плати се недоволни и недостигаат 6 383 денари. Не може мерка за животниот стандард да биде само статистиката, туку реалната можност на граѓаните достоинствено да ги задоволат основните потреби. Владата мора да понуди конкретни решенија наместо да ги отфрла предлозите за повисоки плати“,
порача Битиќи од собраниската говорница.