Мирно и со испорачување на три барања заврши првиот од серијата најавени антивладини протести на ВМРО-ДПМНЕ, кој доаѓа по нецели две недели од изборот на новата влада на Зоран Заев.
Неколку стотини демонстранти пред Министерството за правда го дочекаа партискиот лидер Христијан Мицкоски, кој со останатото раководство и друга голема група демонстранти им се приклучија нешто по 18 часот.
„Скапа струја, сиромашен народ”, пишуваше пред големиот транспарент на толпата, која на чело со Мицкоски се упати кон просториите на Регулаторната комисија за енергетика во центарот на Скопје.
Со фотографии од прослава во штабот на СДСМ на која се гледа првиот човек на оваа комисија, Марко Бислимовски, транспаренти „Заев полни џеб, народот нема за леб”, „Народот трпи за леб, да се полни функционерски џеб” и по некој црвен картон, тие пристигнаа пред Регулаторната комисија, по пат извикувајќи „оставка” и „мафија на робија”. Поголемиот дел носеа маски, но имаше и такви без или со маски под брадата. Растојание, пак, речиси никој ме држеше.
Ова е само првиот од протестите кои ќе следуваат против власта, порача Мицкоски кој рече дека вечерва имаат само три конкретни барања: враќање на старата цена на струјата, викенд без ДДВ и професионален состав на Регулаторната комисија.
Тој се обрати последен од петтемина говорници на протестот.
Пред да започне нивното обраќање, организаторите преку озвучувањето ја интонираа државната химна, а кога озвучувањето откажа, присутните во еден глас продолжија со пеењето. Актерот Зоран Љутков набргу почна да ги најавува говорниците, обични граѓани кои, како што рече, на своја кожа ги почувствувале последиците од поскапувањето на струјата.
Оваа Регулаторна комисија треба да е независно тело, ветуваа помали сметки за струја, а сега ни стигнуваат поголеми. Да се намали цената на струјата, а Регулаторна да има разбирање за нашата загриженост, бидејќи не секој е во можност да ги плати сметките, Владата да се прибере и да ги скрати трошоците – сумирано се пораките кои ги испратија првите тројца говорници, Ердоган Сарач, Ерџан Демир и Славица Секуловска.
Прв јавен настап од новата фунција имаше и Сергеј Попов, новоименуваниот претседател на УМС на ВМРО-ДПМНЕ. Тој порача дека младите се гневни поради неправдата и тоа што државата за едни е мајка, за други маќеа.
„На расипништвото на власта му нема крај. Дали треба дополнително да ги осиромашиме нашите граѓани? Тоа е неправдата која мора да ја промениме. Затоа денес протестирам и ќе продолжам да го правам тоа во името на секој млад човек кој сака достоинствен живот”,
рече Попов.
Мицкоски, како последен говорник, ги испорача трите барања од овој протест, а во обраќањето ги спомена и аферите за кои опозицијата изминатиот период постојано ја обвинува власта и порача дека тоа што на владејачката гарнитура и се чини како нов почеток е, всушност, почетокот на нејзиниот крај.
Поздравувајќи се попатно со неколку групи граѓани, Мицкоски со останатото партиско раководство замина од пред Регулаторната комисија, а се разотиодоа и демонстрантите.
Поврзана вест:
(ВИДЕО) Започна протестот на ВМРО-ДПМНЕ, учесниците извикуваат „мафија“ и „оставка“