Различни се и бројките за масовноста на протестите. Повеќето медиуми наведуваат дека само во Москва се собрале над 40 000 демонстранти, додека властите велат дека биле околу 4 000
Десетици илјади демонстранти денеска излегоа на протести во повеќе руски градови за да искажат поддршка на уапсениот опозиционер Алексеј Навални и да побараат негово ослободување.
На протестите, според извештаите во медиумите, се уапсени над 1 000 луѓе. „Ројтерс“ јавува, пак, и за бројка од над 1 500 уапсени. Бројките на кои се повикува оваа новинска агенција се од граѓанското движење за набљудување на протестите, ОВД-Инфо, според кое приведени се најмалку 1 614 лица во цела Русија, вклучувајќи ги тука и 513 апсења во Москва и 212 во Санк Петербург.
Меѓу уапсените била и сопругата на опозиционерот, Јулија Навални, која потоа била ослободена. Таа самата соопшти дека е уапсена со објава на социјалните мрежи.
„Извинете за лошиот квалитет. Многу е слаба светлината во полициското комбе“,
напиша Јулија Навални на Инстаграм покрај фотографија.
Различни се и бројките за масовноста на протестите. Повеќето медиуми наведуваат дека само во Москва се собрале над 40 000 демонстранти, додека властите велат дека биле околу 4 000.
Од Министерството за надворешни работи реагирале и со ироничен коментар на процените на репортерите на „Ројтерс“ за масовноста на протестите.
„Зошто веднаш да не кажеме дека биле 4 милиони?“,
е ироничниот коментар кој го оставиле на официјалниот канал на мрежата Телеграм.
На овие протести повика и самиот Навални откако беше уапсен на 17 јануари на аеродромот Шереметјево веднаш по пристигнувањето од Германија, каде беше пренесен на лекување по обидот за труење.
„Путин е крадец“, Срамота“, „Слобода за Навални“ се дел од паролите кои ги скандираа демонстрантите.
Навални се наоѓа во притвор во затвор во Москва. Одреден му е притвор од 30 дена бидејќи руските власти го товарат дека ја прекршил условната казна со неговото заминување во Германија поради лекување откако имаше беше отруен. Навални за труењето, пак, го обвинува претседателот Владимир Путин, додека тој од друга страна ги отфрли обвинувањата тврдејќи дека Навални е дел од валканите трикови на САД.
Поврзани вести:
- (ВИДЕО) Приведени повеќемина приврзаници на Навални на московскиот аеродром Внуково
- Алексеј Навални уапсен по пристигнувањето во Москва
- ЕУ бара итно ослободување на Навални – руските власти одговорија: Ќе одлучи судот
- И САД го осудија апсењето на Навални: Бараат безусловно ослободување
- Русија не реагира на меѓународните повици за Навални: Ова е внатрешно прашање