Осомничениот во период од февруари до 14 август годинава, заедно со три лица против кои се води постапка во Грција, неовластено организирал набавка, држење и пренесување на 324 килограми и 474 грама марихуана, со цел нејзина понатамошна продажба
Триесетдневен притвор доби македонскиот државјанин, кој во петокот беше уапсен за време на координираната полициска акција во Солун, во рамки на која беше сузбиена меѓународна организирана криминална група и беа запленети 324 килограми марихуана. Од Основното јавно обвинителство за гонење организиран криминал и корупција (ОЈО ГОКК) соопштија дека против него е покрената постапка поради основано сомнение за неовластено производство и пуштање во промет наркотични дроги, психотропни супстанции и прекурсори.
Според наводите на ОЈО ГОКК, осомничениот во период од февруари до 14 август годинава, заедно со три лица против кои се води постапка во Грција, неовластено организирал набавка, држење и пренесување на 324 килограми и 474 грама марихуана, со цел нејзина понатамошна продажба. Кон крајот на февруари осомничениот набавил возило, а на почетокот на март и приколка, по што организирал наводен превоз на рециклирана пресувана хартија од Северна Македонија кон Турција, преку Бугарија.
„Откако ги завршил царинските формалности, на 8 март 2026 година осомничениот со товарното возило и приколката ја напуштил македонската територија во правец кон Бугарија. Меѓутоа, наместо да продолжи кон Турција, се упатил кон Грција, каде возилото со приколката го оставил на изнајмен затворен плац во Солун“,
наведуваат од Обвинителството.
Во Солун се сретнал со двајца од осомничените против кои се води постапка во Грција и го договорил понатамошниот транспорт на марихуаната, откако ќе биде сокриена во товарот со рециклирана хартија. По набавката на марихуаната, двајца од осомничените со засега непознати лица, од 11 до 14 август ја сместиле дрогата во претходно направени отвори во балите со рециклирана хартија.
„На 14 август, во рамките на акцијата ‘Вардарис’, полициски службеници во Грција лишиле од слобода двајца од осомничените и извршиле преглед и претрес на изнајмениот плац. Таму била пронајдена приколката, од која претходно биле отстранети регистарските ознаки. Во четири палети сместени во задниот дел од приколката и во уште четири палети пред неа била пронајдена марихуаната“,
велат од ОЈО ГОКК.
Поради опасност од бегство, ОЈО ГОКК предложи мерка од 30-дневен притвор за осомничениот, која е прифатена од страна на Основниот кривичен суд Скопје.