Кина испрати помош за Македонија со заштитна опрема и тестови за ковид-19. Вицепремиерот Бујар Османи на онлајн-средба со кинескиот амбасадор во земјава изрази благодарност за донацијата.
„Пристигна и последната пратка од кинеската помош во тестови и заштитна опрема“,
напиша Османи на Фејсбук.
Кинескиот амбасадор Џанг Ѕуо порача дека ова е пријателски гест и дека е неопходна солидарност во борбата со пандемијата.
„Судбината на сите земји е меѓусебно поврзана. Ниту една земја не може да се справи со ова сама. Кина и Северна Македонија се добри пријатели и добри партнери. Во најкритичниот период на епидемијата во Кина, пријателите од Северна Македонија изразија поддршка за кинескиот народ. Кина секогаш ќе го има ова предвид“,
порача кинескиот амбасадор.
Минатата недела кинеската амбасада во земјава донираше 30 000 евра за справување со пандемијата со коронавирусот.