Претседателката на Косово во објавата на Фејсбук додава дека доколку Борел ги почитувал основните принципи на неутралност, наместо да го обвинува Косово, можел да ѝ ги посочи на Србија барем дел од, како што вели, прекршоците кои ги има направено од Бриселскиот договор
Во меѓувреме, портпаролот на Европската Унија за надворешна политика и безбедност, Петер Стано ги демантира изјавите на косовскиот премиер Курти оти ЕУ се откажува од предлогот за нормализација на односите меѓу Косово и Србија. Тој рече дека ЕУ целосно стои зад овој предлог и ги охрабрува страните да се договорат за текстот штом бидат подготвени и да и докажат на меѓународната заедница дека се подготвени за европско решение
Претседателката на Косово, Вјоса Османи вечерва преку објава на социјалните мрежи го обвини шефот на европската дипломатија Жозеп Борел за пристрасност во процесот на медијација и обид за постигнување на договор и смирување на тензиите помеѓу Белград и Приштина.
„Првото правило на секој процес на медијација е непристрасност. Она што го видовме денес од господинот Борел беше отворена пристрасност и презентација на целосно искривена реалност“,
пишува косовската претседателка Османи на социјалните мрежи.
Таа во објавата на Фејсбук додава дека доколку Борел ги почитувал основните принципи на неутралност, наместо да го обвинува Косово, можел да ѝ ги посочи на Србија барем дел од, како што вели, прекршоците кои ги има направено од Бриселскиот договор.
„Косово никогаш нема да се откаже од својата јасна цел за долгорочен мир и стабилност, како и закон и ред на целата територија“,
додава Османи.
Ваквата реакција на косовската претседателка доаѓа по неуспешните разговори меѓу премиерот на Косово Албин Курти и претседателот на Србија Александар Вучиќ за регистарските таблички на северот на Косово. Шефот на европската дипломатија Борел одговорноста за непостигнувањето на договорот ја префрли на косовската страна.
„Поднесовме предлог кој може да ја избегне оваа опасна ситуација. Претседателот Вучиќ го прифати, но за жал премиерот Курти не“,
изјави претходно денеска Борел пред новинарите.
На ова, косовскиот премиер Курти изјави дека предлогот на ЕУ во врска со српските регистарски таблички е неприфатлив за косовските власти, а дека посредниците на ЕУ „се откажале“ од нивниот предлог за нормализирање на односите меѓу Косово и Србија.
Во меѓувреме, портпаролот на Европската Унија за надворешна политика и безбедност, Петер Стано ги демантира изјавите на косовскиот премиер Курти оти ЕУ се откажува од предлогот за нормализација на односите меѓу Косово и Србија. Тој рече дека ЕУ целосно стои зад овој предлог и ги охрабрува страните да се договорат за текстот штом бидат подготвени и да и докажат на меѓународната заедница дека се подготвени за европско решение.
„Клучно е страните да избегнат ескалација, која бара итна акција од двете страни – Косово да не изрекува казни, а Србија да не издава регистарски таблички со ознаки КМ (Косовска Митровица). Не може да има преговори за нормализација на односите во присуство на закана од насилство“,
рече тој.
Српскиот претседател Александар Вучиќ по средбата со Курти и европските претставници изјави дека српската страна ќе ги почитува советите и барањата на шефот на европската дипломатија Борел, кој побара Косово да не применува казни, а Србија да не издава нови регистарски таблички.