Од МЗ повторуваат дека кај лицата кои се комплетно имунизирани (со две дози од вакцината против ковид-19, по поминати 14 дена од втората доза) мали се шансите при контакт на вирусот да се инфицираат и да бидат позитивни, но и тогаш тие се со полесни симптоми на болеста
Комплетна имунизација против ковид-19 се смета со добивање на две дози (со исклучок на вакцината на Ј&J која се прима само во една доза) во дефиниран интервал, 14 дена по примање на втората доза, а прелеќувањето на ковид не е пречка за имунизација, посочуват од Министерството за здравство, објаснувајќи ги препораките од здравствените организации одговорни за следење на инфективните болести како Европскиот и Американскиот Центар за инфективни заболувања (CDC и ECDC), од регураторните медициски агенции ЕМА и ФДА и од СЗО.
Во однос на типот на вакцините, потребно е имунизација да се изведе со вакцина од ист прозводител, освен доколку не постои здравствена контраиндикација за тоа.
Исто така, се посочува дека лицата кои ја имаат прележано болеста треба да се вакцинираат, бидејќи имунитетот кој се создава по прележување на болеста како и самиот тек на болеста е индивидуален и може да биде комплетно асимтоматски со постигнување на послаб имунитет, до тешки облици и компликации од болеста и состојби на т.н пролонгиран ковид, наведуваат од МЗ.
Една од препораките е и дека временскиот период од прележување на болеста до вакцинација е најмалку месец дена, а одредување на нивото на антитела не се препорачува и нема влијание врз вакцинацијата.
Кај лицата, пак, кај кои во тек на лекувањето дадена е терапија со моноклонални антитела или конвалесцентна плазма, вакцинацијата може најрано да биде по три месеци од терапијата и комплетно оздравени од болеста.
Кај лицата кои во периодот меѓу примање на двете дози од вакцината против ковид-19 се потврди дека се позитивни, втората доза на вакцината се одложува до период кога лицето ќе биде комплетно оздравено од болеста.
Од МЗ исто така, посочуваат и на некои научни истражувања кои се уште се лимитирани и упатуваат дека кај прележаните лица со ковид-19 можно е да е потребна само една доза на вакцина. Сепак, бидејќи нема точни податоци колкава заштита обезбедува само една доза на вакцина, овој став не е прифатен од релевантните здравствени регулаторни тела.
Од МЗ повторуваат дека кај лицата кои се комплетно имунизирани (со две дози од вакцината против ковид-19, по поминати 14 дена од втората доза) мали се шансите при контакт на вирусот да се инфицираат и да бидат позитивни, но и тогаш тие се со полесни симптоми на болеста, бидејќи вакцината обезбедува заштита од развој на тешки облици на болеста и смртност. Односно, податоците покажуваат дека кај лицата кои се вакцинирани доколку се развијат симптоми, болеста минува многу поедноставно и без тешка клиничка слика.
„Епидемиолошките податоци на светско ниво покажуваат дека болеста се шири и доаѓа до заболување на лицата кои не се вакцинирани, а во овој бран доминантно тоа се младите лица како популација, кај кои процентот на вакцинација е најнизок“,
се наведува во соопштението.