По обвинувањата кои беа изнесени во јавноста дека раководството сака да го оспори огласот бидејќи не се избрани посакуваните кандидати, од М-НАВ негираа и вчера излегоа со соопштение дека го прифатиле изборот на кандидати за обука за контролори на летање, предложен од Комисијата за избор и селекција и даде насоки за нивно вработување на определено време и упатување на школување
Управниот одбор (УО) на М-НАВ постапи добро со тоа што го заврши конкурсот за контролори на летање онака како што бил започнат и како што бил евалуиран од страна на данските консултанти.
Ова го порача денеска премиерот Димитар Ковачевски, откако пред три дена порталот „СДК.мк“ објави дека тројца членови на УО сакаат да го оспорат огласот бидејќи меѓу осумте кандидати што го положиле испитот и биле селектирани за обуката од страна на данска фирма што го доби тендерот, не се децата на членовите на УО и на функционери од ДУИ кои конкурирале.
Во денешната изјава, одговарајќи на прашањето што ќе преземе владата за случувањата со конкурсот, премиерот кажа дека уште во текот на минатата недела ги повикал тројцата директори од М-НАВ да дојдат и да реферираат на седница на Влада.
На темата денеска зборуваше и министерот за транспорт и врски, Благој Бочварски, кој рече дека прашањето за вработување контролори на летање е затворено согласно домашните процедури, законите и меѓународните правила, но и порача дека во државната компанија М-НАВ не смее да има никакви манипулации во која било постапка.
„Таму не смее да има никакви манипулации во која било постапка. Вчера Владата информираше, но и компанијата информирала дека веќе е завршена постапката за вработување, согласно процедурите коишто ги имаат. Поради тоа сметаме дека тоа прашање е затворено на начин на коешто треба да биде затворено согласно процедурите и законите во државата и меѓународните правила“,
рече Бочварски.
Обвинувањата дека членовите на УО на М-НАВ сакаат да го поништат огласот бидејќи не се избрани „посакуваните“ кандидати во јавноста ги изнесе претседателот на Струковиот синдикат на контролори за летање (ССКЛ), Александар Тасевски.
Од Владата тогаш порачаа дека државната компанија е обврзана во своето работење да ги следи строгите правила на Евроконтрол и на Меѓународниот систем за управување со воздушен сообраќај на којшто е членка.
Раководството на М-НАВ, пак, излезе со демант дека не го оспорува конкурсот, а вчера соопшти дека го прифатиле изборот на кандидати за обука за контролори на летање, предложен од Комисијата за избор и селекција и даде насоки за нивно вработување на определено време и упатување на школување.