Изборите не се врзани со двотретинското мнозинство. Кога и да бидат изборите, нема начин која било од партиите сама да има две третини и без поддршка од другата партија да ги комплетира уставните измени. Затоа, мислам дека е непотребно да се врзуваат тие две тези, рече вицепремиерот за европски прашања во гостувањето во „360 степени“
Брзи избори не се опција за власта дури ни при евентуално деблокирање на евроинтеграцискиот процес за земјава во јуни, вели вицепремиерот за европски прашања, Бојан Маричиќ, во интервју за „360 степени“ на ТВ Алсат. Прашан што е планот на Владата ако при можен почеток на преговорите треба да се гласаат уставни измени до отворање на првиот кластер, без поддршка од опозицијата, Маричиќ смета дека и во тој случај избори не се решение.
„Изборите не се врзани со двотретинското мнозинство. Кога и да бидат изборите, нема начин која било од партиите сама да има две третини и без поддршка од другата партија да ги комплетира уставните измени. Затоа, мислам дека е непотребно да се врзуваат тие две тези. Ако има договор и ако има успех, нам ќе ни треба време, сила и енергија и поддршка од Собранието за имплементација на договорот“,
одговори Маричиќ.
Според вицепремиерот, прашањето за предвремени избори постојано се наметнува од опозицијата заради собирање политички поени на контото на Христијан Мицкоски.
„Што и да се случи во јуни, во услови на многу кризи собрани во исто време и на исто место – економската, енергетската, безбедносна и онаа со цените, потребен е сериозен тим за нивно решавање. Не ни се потребни предвремени избори во овој момент за спасување на чија било кариера, особено не на лидерот на опозицијата. Тезата за избори е намерно пласирана од опозицијата на секои шест месеци“,
рече вицепремиерот за европски прашања, кој доаѓа од редовите на СДСМ.
Во однос на актуелната владина коалиција со ДУИ и Алтернатива, Маричиќ вели дека меѓусебната соработка е на завидно ниво. Тој уверува дека секоја партија, а не само ДУИ, добила важни ресори и дека во првите сто дена Владата функционирала како тим, без оглед на партиската припадност.
„Одлични односи, одлична соработка досега, во овие 100 дена немало никаков проблем. Се дискутира, се разговара и се решаваат прашањата. Нормално, нов состав на Владата е, па овој период се искористи за привикнување. Мојата перцепција и она што го слушнавме од изјавите вчера на премиерот Ковачевски и денес од вицепремиерот Груби коиндицира, а тоа е дека е владината коалиција е стабилна. И Африм Гаши, претседателот на Алтернатива, излезе со став дека е задоволен од учеството во Владата, така што трите најголеми коалициони партнери изразија задоволство од соработката и јасна поддршка на Владата до крајот на мандатот“,
вели Маричиќ.