Министерот за транспорт, образложувајќи го предлогот на Владата, информира и за реализацијата на проектот по одделни објекти на трасата. Како што кажа, 88 проценти од нив се завршени, изградбата на тунелите е со реализација од 93 отсто, а ископот на земјениот материјал од 83 проценти
Со 78 гласа „за“ и ниту еден „против“ или воздржан Собранието на денешната 150. итна седница го изгласа предлогот на Владата по скратена постапка да се донесат законските дополнувања, односно новиот анекс на договорот со кинеската компанија „Синохидро“ за пролонгирање на рокот за завршување на изградбата на автопатската делница Кичево-Охрид.
Потребата од донесување на дополнувањата на законот кој во целост гласи Закон за реализација на инфраструктурни проекти за изградба на патна делница Миладиновци-Штип (завршена н.з) и делница Кичево-Охрид ги образложи министерот за транспорт и врски Благој Бочварски.
Според дополнувања што техничката влада ги утврди на седницата на 26 март, новиот краен рок до кога треба да бидат завршени градежните работи на автопатот Кичево-Охрид е предложено да биде 31 декември 2026 година.
„Предлагаме како Влада по скратена постапка, согласно членот 170 од Деловникот за работа на Собранието да се продолжи рокот за реализација на проектот за изградбата на автопатот Кичево-Охрид од причина што овој Закон со кој е донесен и се гради овој автопат не е обемен и се работи за Закон со кратка содржина. Законот не повлекува дополнителни финансиски импликации“,
рече Бочварски од собраниската говорница.
Како основа за предлогот за продолжување на рокот за изградба на делницата, Кичево-Охрид, чиј изведувач е кинеската компанија „Синохидро“, Бочварски ги наведе и добиените мислења од надзорот на изградбата на делницата и ФИДИК-експертот што го ангажираше Јавното претпријатие за државни патишта и Владата. Причините за пролонгирање на рокот за завршување на делницата, додаде тој се добро познати на јавноста, а тоа се 13 нови свлечишта, за што е потребно ново проектирање и технички решенија.
„Според добиените дописи и мислења од страна на надзорот и ФИДИК-експертот кој беше ангажиран од страна на Јавното претпријатие за државни патишта и Владата прогресот на работите е 83,84 проценти, со што се предлага Владата да предложи до Собранието продолжување на рокот за реализација на овој проект. Причините за продолжување на рокот за реализација на овој проект се добро познати за јавноста, поради појавувањето во најголем дел на 13 нови свлечишта на самата траса за кои е потребно дополнително проектирање, технички решенија со цел да се решат пропустите во техничката документација коишто се појавија при реализацијата на овој проект“,
рече министерот за транспорт и врски.
Бочварски информираше и за реализацијата на проектот по одделни објекти на трасата.
„Во однос на реализацијата на проектот по поодделни објекти на трасата, можам да информирам дека објектите се реализирани со 88 проценти, тунелите со 93 проценти, ископот на земјениот материјал со 83 проценти“,
рече Бочварски.
Откако Собранието ја изгласа потребата од носење на дополнувањата по скратена постапка, претседателот на законодавниот дом ги задолжи Комисијата за транспорт, врски и екологија, како матично работно тело и Законодавно-правната комисија да расправаат по предлогот.
Владата на последната седница на 26 март предложи на постојниот закон да биде додаден анекс број 6 со кој на изведувачот на работите на делницата Кичево- Охрид, кинеската компанија „Синохидро“ ќе му биде даден дополнителен рок за да ги заврши работите, откако тоа не успеа да го направи во првично предвидениот, кој беше до крајот на минатата година.
„Цел на Предлогот на закон за дополнување на Законот за реализација на инфраструктурни проекти за изградба на патна делница Миладиновци – Штип и патна делница Кичево-Охрид е склучување на Анекс бр. 6 кон Договорот за изградба на автопат, делница Кичево – Охрид, каде што се утврдува дека поради настанати измени во градежните работи рокот за завршување се менува од 3 531 дена во 4 627 дена од денот на воведување во работа на Изведувачот, со што Изведувачот има право на продолжување на рокот за завршување на градежните работи за дополнителни 1 096 дена, па оттука крајниот рок е ревидиран на 31.12.2026 година“,
се наведува во предлог дополнувањето на Законот.
Неодамна лидерот на СДСМ и поранешен премиер Димитар Ковачевски изјави дека за продолжувањето на проектот за изградба на автопатот Кичево-Охрид ќе одлучи новиот состав на Собранието по изборите, како и тоа дали работите ќе продолжат со истиот изведувач или ќе се бара нов.
Ковачевски на 15 март изјави дека веднаш штом ќе се спроведе ново анексирање во Собранието или нова одлука од пратениците во Собранието, проектот ќе продолжи, затоа што како што рече, тој договор е донесен во Собрание уште пред десетина години.
Лидерот на ВМРО-ДПМНЕ, Христијан Мицкоски, пак пред нешто повеќе од еден месец изјави дека кога неговата партија ќе дојде на власт по изборите в мај, автопатот Кичево-Охрид ќе биде завршен и пуштен во употреба за две години отсега, односно кон втората половина или кон крајот на 2026 година.
Владата, на седница одржана на 28 декември, лани ги овласти кабинетот на вицепремиерот за економски прашања, Министерството за транспорт и врски и Јавното претпријатие за државни патишта, да отпочнат преговори со изведувачот на изградбата на автопатската делница Кичево – Охрид, кинеската компанија „Синохидро“, за склучување анекс на договор за продолжување на рокот за изведба, со искористување на веќе обезбедените финансиски средства за доизградба на автопатот.
Инаку, откако стана јасно дека автопатот нема да биде завршен во првично предвидениот рок (31 декември 2023 г.), од Министерството за транспорт и врски кон крајот на минатата година беше побарано Државниот завод за ревизија да изврши ревизија на проектот, а заедно со Јавното претпријатие за државни патишта (ЈПДП) беше ангажиран и експерт за ФИДИК-договори (меѓународен стандард според кој се реализираат меѓународни договори) да го анализира договорот меѓу Владата и изведувачот на проектот – кинеската компанија „Синохидро“.
„360 степени“ лани во октомври објави сторија за состојбата со изградбата на оваа автопатска делница. Сликата на терен тогаш остави впечаток дека нема реални изгледи изградбата на автопатот од Кичево до Охрид да заврши во 2023 година, како што беше предвидено со закон. Договорот за изградба на делницата е потпишан пред точно 10 години со кинески „Синохидро“, а за тоа досега се потрошени 421 милион од предвидените 598 милиони евра, иако првичната сума за проектот беше 374 милиони.