„Затоа сметам дека она што го направи Министерството за транспорт и врски е добра работа, затоа што се повика експерт што треба да направи анализа на сè она што е направено досега, да направи ревизија на она што е направено. Се работи за договор кој е донесен со закон, значи самиот договор е закон во Собранието. Сепак, парламентот во новиот состав треба да одлучи на кој начин ќе продолжи проектот, дали со истиот изведувач или ќе се бара изведувач што има покажано дека може да направи пат“, рече претседателот на СДСМ
Собранието во новиот состав ќе одлучи на кој начин ќе продолжи проектот со автопатот Кичево-Охрид, дали тоа ќе биде со истиот изведувач или на крај ќе се избира изведувач што има покажано дека може да се направи пат. Ова денеска го изјави претседателот на СДСМ, Димитар Ковачевски, по увидот во изградба на локални улици во скопски Хиподром, одговарајќи на новинарско прашање кога може да биде готов пат Кичево-Охрид, при што посочи дека она што мора да се направи е прво тој пат да се заврши бидејќи, како што рече, граѓаните го заслужуваат тоа, но и градот Охрид, како најголем туристички центар во земјава.
„Ќе ви дадам еден податок, на завршени делници на патот, кој е завршен 80-85 отсто, во последниот квартал на минатата година имаше 13 свлечишта со огромни количини земја паднати врз нив кои сега треба да се чистат, да се репроектираат“,
рече тој.
Според него, овој пат е пример како не треба да се проектира пат од првиот ден. Патот има лошо испроектирани косини, кои уште тоа време, како што рече, пред 10 години се толку лошо направени, што не се предвидело дека на крај завршуваат во Албанија.
„Затоа сметам дека она што го направи Министерството за транспорт и врски е добра работа што се повика експерт што треба да направи анализа на се она што е направено досега, да направи ревизија на она што е направено. Се работи за договор кој е со закон донесен, значи самиот договор е закон во Собранието. Сепак, парламентот во новиот состав треба да одлучи на кој начин ќе продолжи проектот, дали со истиот изведувач или ќе се бара изведувач кој има покажано дека може да направи пат“,
вели Ковачевски.
Според него, ова е потврда дека кога проекти се прават набрзина пред избори резултатот е ваков.
„Овој проект за Кичево-Охрид беше направен токму пред избори во последниот мандат на владата на ВМРО-ДПМНЕ пред 2016 година. И самите тие и нивни колеги кои учествувале во проектирањето велат дека тоа било набрзина направено, по Гугл се правеле рутите, поминувале преку резервоари за вода, преку гробишта, косини непроектирани, свлечишта непроектирани, експропријации незавршени и затоа е одложена таа работа“,
рече претседателот на СДСМ.
Веднаш штом ќе се спроведе ново анексирање во Собранието или нова одлука од пратениците во Собранието, според Ковачевски, проектот ќе продолжи, зашто вели тој договор е донесев во Собрание уште пред десетина години.
Лидерот на ВМРО-ДПМНЕ, Христијан Мицкоски, пред еден месец изјави дека кога неговата партија ќе дојде на власт по изборите в мај, автопатот Кичево-Охрид ќе биде завршен и пуштен во употреба за две години отсега, односно кон втората половина или кон крајот на 2026 година.
„360 степени“ пред неколку месеци објави сторија за состојбата со изградбата на оваа автопатска делница.
Сликата на терен остави впечаток дека нема реални изгледи изградбата на автопатот од Кичево до Охрид да заврши во 2023 година, како што беше предвидено со закон. Договорот за изградба на делницата е потпишан пред точно 10 години со кинески „Синохидро“, а за тоа досега се потрошени 421 милион од предвидените 598 милиони евра, иако првичната сума за проектот беше 374 милиони.