Пратеникот од ВМРО-ДПМНЕ, Бране Петрушевски, по напуштањето на седницата за медиумите изјави дека како опозиција побарале да не се кријат туку да разговараат за тоа кои се системските пропусти во МВР кои доведуваат до вакви ситуации
Барањето на министерот за внатрешни работи Оливер Спасовски и претседателот на собраниската Комисија за одбрана и безбедност Миле Талевски денешната седница на чиј дневен ред како единствена точка е информацијата за преземени мерки и активности во врска со лажните дојави за поставени експлозивни направи да биде затворена за јавноста беше причина членовите на ова тело од опозициската ВМРО-ДПМНЕ да ја напуштат седницата.
Пратеникот од ВМРО-ДПМНЕ, Бране Петрушевски, по напуштањето на седницата за медиумите изјави дека како опозиција побарале да не се кријат туку да разговараат за тоа кои се системските пропусти во МВР кои доведуваат до вакви ситуации.
„Денеска се докажа дека главата на организираниот висок криминал е во високите структури во МВР. Сметавме дека седницата може да се подели во два дела, односно во првиот дел да разговараме за отворени работи, кои не треба да бидат класифицирани. Побаравме да разговараме како е можно МВР да нема капацитет да открие лажни дојави за бомби. Побаравме тоа да биде тема за расправа, а во вториот дел да расправаме за сите информации кои министерот смета дека се класифицирани, но нашиот предлог не беше прифатен“,
рече Петрушевски.
Пратеникот нагласи дека решиле да не учествуваат „во ваков театар“ кој, како што рече, нема да заврши со одговорност.
Тој додаде дека пратениците од опозицијата немале увид во Информацијата за преземени мерки и активности од МВР во врска со лажните дојави за поставени експлозивни направи.
Петрушевски нагласи дека проблемот е што Спасовски и Талевски барале целата седница да биде затворена за јавност и ништо од дискусијата и информациите не може да биде обелоденето.
„Бегаат од одговорност и од јавноста. Информацијата што ја доставил министерот е класифицирана. Очекуваме да знаеме дека државата презела нешто, но ова што тие го бараат седницата да биде затворена, може да не наведе да мислиме дека не е преземено ништо. Се класифицира нешто што не мора да се класифицира“,
рече Петрушевски.
Засега нема информации дали седницата на Комисијата ќе биде продолжи без пратениците од опозицијата.
Комисиската седница се одржува додека во меѓувреме траат антитерористичките проверки во училиштата кои денеска добија дојави за поставени бомби во своите објекти.
Заканувачки пораки, според информации на МВР, денеска добија три училишта во Битола, по две училишта во Тетово и Прилеп, седум училишта во Скопје и едно училиште во струшко Подгорци.
По добиените пријави за поставени експлозивни направи, од МВР информираа дека антитерористичките екипи вршат проверки и преземаат мерки за расчистување на случаите.
Пред собраниската Комисија за надзор над работата на безбедносните служби, пак, утре треба да реферира Агенцијата за национална безбедност (АНБ) во врска со активностите што ги презела во врска со континуираните дојави за поставени бомби.
На седницата пред Комисијата се очекува да реферира новиот директор на АНБ, Зарко Милошевски.