Според собранискиот календар, за 27 декември се закажани две седници на Комисијата за надзор над работата на АНБ и на Агенцијата за разузнавање (АР) – едната е продолжението на седницата на која АНБ треба да реферира за нејзината улога во безбедносната проверка на лицето Олександр Онишченко при давањето позитивно мислење за добивање македонско државјанство, додека на другата единствена точка на дневен ред е: „Информирање за преземените активности на Агенцијата за национална безбедност во врска со актуелните случувања со дојавите за поставени бомби во училиштата, трговските центри и други објекти“
Агенцијата за национална безбедност (АНБ) во вторник следната недела треба да реферира пред собраниската Комисија за надзор над работата на безбедносните служби за активностите што ги презела во врска со континуираните дојави за поставени бомби, чија цел подолг период во земјава се училишта, трговски центри и други објекти со голема фреквенција на луѓе.
Како што може да се види на собранискиот календар, за 27 декември се закажани две седници на Комисијата за надзор над работата на АНБ и на Агенцијата за разузнавање (АР), чиј претседател е пратеникот на ГРОМ, Љупчо Пренџов.
Првата закажана за 12 часот, всушност, е продолжението на седницата на која АНБ треба да реферира за нејзината улога во безбедносната проверка на лицето Олександр Онишченко при давањето позитивно мислење за добивање македонско државјанство.
На другата, која треба да почне еден и пол час подоцна, односно во 13:30 часот, единствена точка на дневен ред е:
„Информирање за преземените активности на Агенцијата за национална безбедност во врска со актуелните случувања со дојавите за поставени бомби во училиштата, трговските центри и други објекти“
На двете седница пред Комисијата се очекува да реферира новиот директор на АНБ, Зарко Милошевски.
Дојавите за бомби, кои по антитерористичките проверки на МВР се покажаа како лажни, почнаа кон крајот на октомври. Оттогаш речиси секоја недела во последователни интервали од два-три дена преку електронска пошта пристигнуваат пораки со закани за поставени експлозивни направи.
Цел на дојавите претежно се средни и основни училишта, но вакви пораки пристигнаа и во трговски центри, хотели, транспортниот центар во Скопје, Фудбалската федерација и Меѓународниот аеродром „Скопје“.
Неодамна на американската амбасада во земјава и германското министерство за надворешни работи издадоа безбедносни предупредувања до своите граѓани кои планираат да патуваат или престојуваат во земјава да бидат дополнително внимателни поради оваа појава и да ги следат упатствата на локалниот безбедносен персонал и полицијата на самото место.
Министерот за внатрешни работи Оливер Спасовски во повеќе наврати изјави дека ваквите дојави се дел од т.н. хибридна војна што не се води само кај нас.
Последните дојави за поставени бомби се случија вчера во 13 скопски училишта. По извршените антитерористички проверки, МВР соопшти дека сите се лажни.
Досега полицијата успеа да расчисти два случаи – едниот за дојави во четири средни училишта во Скопје, а другиот за заканите што стигнаа на електронските адреси на училишта во Кавадарци. И во двата, полицијата осомничени двајца малолетници дека стојат зад лажните дојави. Дека е расчистен случајот со дојавите за бомби, министерот за внатрешни работи информираше денеска.
За останатите дојави, властите во земјава велат дека на испраќачите тешко им се влегува во траг бидејќи мејловите ги испраќаат преку ВПН (виртуелен приватна мрежа) од странство.
Министерот за надворешни работи Бујар Османи на 16 декември изјави дека веќе ги информирале структурите на НАТО за континуираните дојави за поставени бомби во земјава.