Двајцата премиери разговараа и за европската перспектива на Македонија, продлабочување на политичката и економската соработка, како и за актуелните геополитички и безбедносни предизвици
Премиерот Христијан Мицкоски во Њујорк се сретна со словенечкиот премиер Јанез Јанша.
На својот фејсбук-профил објави фотографии од средбата, но и детали од разговорот, посочувајќи дека целта е одличните односи со Словенија да се преточат во уште посилна економска соработка, повеќе инвестиции и конкретни проекти кои ќе создаваат нови можности за граѓаните и стопанството.
„Заеднички интерес е ова пријателство да го преточиме во уште посилна економска соработка, повеќе инвестиции и конкретни проекти кои ќе создаваат нови можности за граѓаните и стопанството“,
вели премиерот.
Двајцата премиери разговараа и за европската перспектива на Македонија, продлабочување на политичката и економската соработка, како и за актуелните геополитички и безбедносни предизвици.
Според Мицкоски, Македонија останува посветена на европската интеграција и реформите, но очекува фер и предвидлив процес заснован на заслуги, исполнети критериуми и реални резултати.
„Нашиот став е јасен – европската интеграција мора да се темели на заслуги, исполнети критериуми и реални резултати, а не на нови билатерални условувања кои немаат суштинска врска со европските вредности. Не бараме привилегии и не бараме пократок пат. Бараме фер и предвидлив процес во кој постигнатото ќе се вреднува, а Македонија ќе биде почитувана како држава и партнер“,
му рекол Мицкоски на Јанша.
Оцени дека Словенија е долгогодишен пријател и важен партнер на Македонија, при што како заеднички интереси ги издвоил зголемувањето на инвестициите и реализацијата на конкретни економски проекти.