Претходно официјални украински претставници ја обвинија Русија за намерно уништување на театарот во Мариупол во кој, според нивни тврдења, во време на нападот имало околу 1 200 луѓе
Украинските власти соопштија дека скривницата во театарот во Мариупол го издржала бомбардирањето, а дека моментално се работи на извлекување на луѓето, како и оти повеќето од луѓето успеале да го преживеат нападот
„Зградата е уништена. Повеќе од илјада жени и деца се наоѓаат во засолништето во подрумот на мариуполскиот театар. Сè уште не знаеме дали има ранети или убиени, но изгледа дека повеќето преживеале и дека се добро“,
ја пренесува Би-би-си изјавата на пратеникот Дмитро Гурин.
Претходно официјални украински претставници ја обвинија Русија за намерно уништување на театарот во Мариупол во кој, според нивни тврдења, во време на нападот имало околу 1 200 луѓе.
Сателитските снимки направени на 14 март и објавени од американската компанија „Максар“, а објавени од Би-би-си, покажаа дека рускиот збор „деца“ со големи букви бил означен на земјата околу театарот за да се предупредат руските авиони.
Министерот за одбрана на Украина, Олексеј Резников, обраќајќи се пред Европскиот парламент преку видеоврска, изјави дека пилотот што го бомбардирал театарот кој се користел како засолниште за цивили во Мариупол е „чудовиште“.
„Веројатно веќе сте слушнале дека театарот беше погоден со ракети, театар во кој се засолниле 1 200 жени и деца. А, на мапите од дроновите може да се види дека околу театарот со големи букви пишува ‘деца’, а сепак, и покрај тоа, чудовиштето фрли бомба врз театарот“,
рече Резников.
Меѓутоа, руската страна синоќа ги демантираше обвинувањата на Киев дека Русија го извршила нападот врз театарот, тврдејќи дека тоа е нова провокација на милитантите од националистичкиот баталјон „Азов“, активирајќи експлозив што претходно го поставиле во зградата на театарот.
Воздушните напади и гранати на Русија претходно погодија породилиште, црква и станбени згради.
Локалните власти велат дека најмалку 2 400 луѓе се убиени во Мариупол од почетокот на војната, а многумина од загинатите се погребани во масовни гробници.
Се проценува дека околу 300 000 жители се заробени во Мариупол, каде што водоводот, струјата и гасот се исклучени. Резервите на храна и вода се при крај бидејќи руските војници не дозволија испорака на хуманитарна помош.