Попис: Во Албанија има 2 281 Македонец, а 7 957 Бугари

Првпат се случува на попис во Албанија да се попишат лица од бугарска националност. Во сите досегашни 11 спроведени пописи ниту еден жител на Албанија не се изјаснил како Бугарин

Во Албанија живеат повеќе Бугари од Македонци, покажаа податоците од спроведениот попис кои ги објави албанскиот институтот за статистика ИНСТАТ, пренесува МИА.

Имено, според пописот, во Албанија живеат живеат 2 281 Македонец, а како Бугари се изјасниле 7 957 лица. Гледано одделно, од вкупната бројка Македонци 1 136 се од машки, додека 1 145 од женски пол.

Првпат се случува на попис во Албанија да се попишат лица од бугарска националност. Во сите досегашни 11 спроведени пописи ниту еден жител на Албанија не се изјаснил како Бугарин.

Бугарската Фондација „Македонија“ до жителите на Пустец: Пишете се Бугари на пописот или ќе ви ги земеме бугарските пасоши

Во прегледот ја пишува припадноста за сите етнички заедници, освен за Македонците. Кај нив стои Северна Македонија.

Од вкупно попишаните, 2 186 917 се Албанци, 23 485 Грци, 12 375 Египќаните, 9 813 Роми, 2 963 Бошњаци, 2 459 Власи, 584 Срби, 511 Црногорци. Преостанатите се изјасниле дека припаѓаат на друга етничка група или одбиле да се изјаснат.

Според пописот, Албанија има 2 402 113 милиони жители. Споредено со пописот спроведен во 2011 година бројот на популацијата е помал за 409 864 жители. Во 2001 година попишани биле 3 069 275 жители.

„Изразено во проценти, бројот на населението споредено со пописот во 2011 година се намалило за 16 отсто. Во периодот 2001/2011 падот е за осум отсто. Произлегува дека процентот на намалувањето на бројот на населението е двојно повисок“,
објави Еуроњуз Албанија.

Ова е 12. по ред попис откако Албанија е прогласена за независна држава, во 1912 година. Првиот попис бил спроведен во 1923 година, а претпоследниот бил во 2011 година. Планираниот за 2021 беше одложен поради пандемијата на ковид-19, а следната година бидејќи не биле обезбедени неопходните алатки за собирање информации на терен.

Македонските медиуми во 2022 година беа полни со написи дека Бугарија создава свое малцинство во Албанија. Во репортажата што ја сними „360 степени“ во септември 2022 година жителите сведочеа дека вадат бугарски пасоши за подобра егзистенција, што е пракса и во Македонија. „Од зорт и мака ќе се правиме Бугари, ама ние сме Егејци Македонци“, рече тогаш една наша соговорничка. Најдовме и такви кои се изјаснуваа за етнички Бугари.