Со извици „никогаш Северна“ точно напладне почнаа протестите пред Собранието кое треба да гласа за предлог-заклучоците со кои ќе го детерминира начинот на кој Владата ќе треба да продолжи во процесот на преговори за членство во ЕУ, имајќи го предвид францускиот предлог. Од опозициската ВМРО-ДПМНЕ и Левица како што најавија и денеска ќе ги поддржат протестите под мотото „Ултиматум-не благодарам“ и ќе порачаат Владата да го отфрли предлогот кој според нив е штетен и води кон бугаризација.
Седницата е закажана за 13 и 30 часот, а претходно е најавено обраќање на претседателката на ЕК, Урсула Фон дер Лајен.
Од СДСМ порачуваат дека Собранието е пред важна одлука за иднината на државата и продолжување на европскиот пат.
„Време е за одлука. Преку усвојување соодветни заклучоци, кои ќе бидат задолжителни за сегашната но и за секоја идна Влада да се обезбеди европскиот пат на земјата и безусловно почитување на јазичните, идентитетските, историските и културните особености на Македонскиот народ, за кои во ниту еден момент не се преговара.Сите пратеници да се вклучат во процесот на носењето на заклучоците, да дадат свој придонес за Собранието да го продолжи европскиот пат“
велат од СДСМ.
Од ВМРО ДПМНЕ најавија дека ќе го разобличат предлогот со аргументи.
„Ковачевски низ собрание турка известување. Тоа што денес ги тера да гласаат пратениците од СДСМ е обична информација. СДСМ нема мнозинство да го промени Уставот и да ја бугаризира државата. ВМРО-ДПМНЕ е пречка за промена на Уставот и нема да поддржи ништо што е на штета на Македонските национални интереси“
велат од ВМРО-ДПМНЕ.
Министерот за внатрешни работи апелираше протестите да бидат мирни.
„Иако ниту вечерашниот, ниту протестите во изминативе неколку дена не беа уредно пријавени, наспроти неодговорноста на организаторите, повикувам на свесност и одговорност во постапките. Никогаш поважни и порешавачки не биле европските вредности и социо-културни манири од сега – моментум кога демократските процеси мора да течат непречено“,
порача Спасовски.