Францускиот предлог за откочување на евроинтеграцијата за земјава, денеска во Собранието е единствена точка на дневен ред на пленарната седница пред пратениците. Пред почетокот на седницата, од македонското Собрание ќе се обрати претседателката на ЕК, Урсула Фон дер Лајен, додека надвор ќе се одржуваат протести за отфрлање на предлогот , под мотото „Ултиматум-не благодарам“.
Од СДСМ порачуваат дека Собранието е пред важна одлука за иднината на државата и продолжување на европскиот пат.
„Време е за одлука. Преку усвојување соодветни заклучоци, кои ќе бидат задолжителни за сегашната но и за секоја идна Влада да се обезбеди европскиот пат на земјата и безусловно почитување на јазичните, идентитетските, историските и културните особености на Македонскиот народ, за кои во ниту еден момент не се преговара.Сите пратеници да се вклучат во процесот на носењето на заклучоците, да дадат свој придонес за Собранието да го продолжи европскиот пат“
соопшти СДСМ.
Од ВМРО-ДПМНЕ, пак и денеска повикуваат на протест за отфрлање на предлогот.
„Ковачевски низ собрание турка известување. Тоа што денес ги тера да гласаат пратениците од СДСМ е обична информација. СДСМ нема мнозинство да го промени Уставот и да ја бугаризира државата. ВМРО-ДПМНЕ е пречка за промена на Уставот и нема да поддржи ништо што е на штета на Македонските национални интереси“
соопшти ВМРО-ДПМНЕ.
Премиерот Димитар Ковачевски вчера повика пратениците да бидат, како што рече на ниво на задачата и да донесат државничка одлука. Заклучоците кои ќе произлезат од собраниската дискусија Владата се очекува да ги разгледа пред да одлучи дали ќе го прифати предлогот.
За опозицијата, пак Фон дер Лајен доаѓа да ја амортизира уцената со убави зборови. Од ВМРО-ДПМНЕ најавија дека тие денеска со аргументи ќе го разобличат предлогот, кој, како што велат е штетен и води кон бугаризација.
Предлогот е неприфатлив и за Левица која веќе постави камп пред Собранието и преку секојдневни протести протести со ВМРО-ДПМНЕ бараат да се отфрли. Протестите наместо вечер тие ќе ги одржат денеска на пладне пред почетокот на обраќањето на Фон дер Лајен во Собранието.
Заклучоците од собраниската дискусија извесно е дека ќе бидат прифатени со најмалку 70 гласови „за“. Освен пратениците од владината коалиција СДСМ, ДУИ, Алтернатива и ДПА , предлогот јавно го поддржаа Беса и Алијанса. Од друга страна, ДОМ вчера порача дека и тие се со став дека треба предлогот да се отфрли, додека неизвесно е како ќе се изјаснат Демократскиот сојуз и ЛДП, кои во неколку наврати го критикуваа францускиот предлог, но оставија простор да се разгледаат заклучоците од работната група во Собранието.