Протоколот е билатерален докуметн кој не ја условува преговарачката рамка, без согласност на двете страни, и на Скопје и на Софија, не може да се случи никаква промена во однос на ниту една од точките во протоколот, вели премиерот Димитар Ковачевски. Во интервју за МИА, тој не прецизира кога јавноста ќе има увид во протоколот, но потенцира дека она што е важно да се знае за протоколот е дека тој се работи на база на реципроцитет.
„Најпрво, сакам да е кристално јасно – протоколот е всушност записник од состанок меѓу министерствата за надворешни работи, билатерален документ кој не ја условува преговарачката рамка. Всушност, протоколот воопшто не е ни споменат во преговарачката рамка. Дотолку повеќе протоколот потврдува дека тој не е поврзан и не ги условува почетокот на преговорите. Од таа причина, апелирам да не се шпекулира и за содржината и за важноста на овој документ. Она што е важно да се знае за протоколот, односно записникот, е дека тој се работи на база на реципроцитет. Ние инсистираме на тоа. Тоа значи дека обврските или задачите кои ќе си ги поставиме ние и Бугарија како две држави, билатерално, тие важат и за двете страни. Никој нема мандат да прифаќа еднострани барања ниту пак може да дејствува по нив. Реципроцитетот како принцип е основа за сѐ што се работи“
вели Ковачевски.
Пред утрешната собраниска седница на која ќе се расправа за предлогот, премиерот очекува суштинска дискусија, а пратениците ги повика да бидат на ниво на задачата која е пред нив и да размислуваат државнички и трезвено, наместо во интерес на политичките партии.
„Во Собранието најпрво ќе се отвори дискусија, а потоа и ќе се донесат заклучоците со кои ќе се задолжи Владата да постапува согласно одредени принципи од кои нема да смее да отстапи, а сѐ со цел заштита на позициите кои нам како држава ни се најважни во целиот овој процес.Во оваа насока, СДСМ прави напори да дојде до предлог заклучоци кои би биле прифатливи за сите партии, а кои ќе го отворат патот за прифаќање на предлогот и ќе овозможат отпочнување на преговорите.Заклучоците кои ќе се донесат практично ќе ја задолжат Владата на Република Северна Македонија, во процесот на преговори да води исклучителна грижа за нашите црвени линии, односно да се обврзе на заштита на националниот идентитет и сите наши специфичности да бидат зачувани и заштитени“
изјави Ковачевски.
Во однос на секојдневните протести за отфрлање на предлогот, Ковачевски ја повика опозицијата инстиуционално да ги аргументира своите барања.
„Искрено се надевам дека ВМРО-ДПМНЕ и Левица ќе смогнат сили и ќе најдат капацитет да ги искажат своите ставови институционално и на форуми каде имаат и обврска да го прават тоа, како што е Собранието. Доколку навистина имаат сериозни грижи како што преставуваат, а протестите не се иницирани само и единствено заради борба за да дојдат до власт, тие треба своето мислење да го искажат пред сѐ на говорница. Од 2017 наваму, ние имаме демократска Влада и вистинско демократско уредување. Сите алатки им се ставени на располагање, нешто што претходно воопшто не беше случај ниту пак се практикуваше“
потенцира премиерот.