Јавниот обвинител до судијата на претходна постапка од Основниот суд во Куманово вечерва достави предлог за определување мерка притвор за осомниченото лице, поради опасност од бегство и можност да го повтори делото
Основното јавно обвинителство – Куманово донесе наредба за спроведување истражна постапка против 35-годишник поради продолжено извршување на тешки дела против општата сигурност предвидено според член 292 став 1 во врска со член 288 став 1 од Кривичниот законик, информираат од Основното јавно обвинителство.
„Постои основано сомнение дека осомничениот на 2 декември, во раните утрински часови, со умисла извршил повеќе поврзани дејствија што преставуваат повеќекратно остварување на исто дело и со пожар предизвикал значителна опасност за животот и телото на луѓето и за имотот, при што настапила поголема имотна штета. Откако претходно во пластични шишиња набавил бензин од бензинска пумпа во Куманово, тој намерно предизвикал пожари на неколку локации во Куманово, каде запалил три патнички моторни возила и еден објект – фотокопирница која се наоѓа во состав на станбена зграда. Мотивите за извршување на делото се испитуваат, но исклучено е дека повод била меѓуетничка нетрпеливост. Доказите до овој момент не укажуваат на инволвираност и на други лица“,
соопшти ЈО.
Јавниот обвинител до судијата на претходна постапка од Основниот суд во Куманово вечерва достави предлог за определување мерка притвор за осомниченото лице, поради опасност од бегство и можност да го повтори делото.
Едно од трите возила што беа запалени минатата недела во Куманово е на јавниот обвинител Џелал Бајрами, а според информации на „360 степени“ другото возило е на близок роднина на пратеник и функционер на ДУИ. Опожарениот дуќан, односно фотокопирница, е на советникот во Советот на Општина Куманово од редовите на ДУИ, Фитор Јакупи.