Директорот на „Македонија пат“, Костадин Ацевски, вели дека поради невремето сè уште има одрони на оваа магистрала и на патот кој води од Делчево кон Македонска Каменица
Во Делчево од утрово екипи на „Македонија пат“ ги санираат штетите на магистралата А3 кај месноста Црквенска Река.
На терен е директорот на „Македонија пат“, Костадин Ацевски, кој информира дека во текот на денешниот ден штетата ќе биде санирана, а најдоцна до понеделник патот ќе биде вратен во употреба.
„Веднаш по штетите кои настанаа на магистралата А3, која го поврзува Делчево со Македонска Каменица, екипи на ‘Македонија пат’ работат на санација на штетите на патот кои се настанати од надојдената вода. Патот денеска ќе биде саниран и по извршување на целосното санирање веќе в понеделник очекуваме да биде пуштен во употреба“,
рече Ацевски.
Ацевски нагласи дека поради невремето сè уште има одрони на останатиот дел од магистралата и патот кој води од Делчево кон Македонска Каменица кои навремено се санираат.
„Има одрони што ги решаваме тековно, големите одрони беа решени. Екипите постојано се на терен и работат на решавање на последиците“,
додаде Ацевски.
Тој напомена дека до целосна санација сообраќајот од Делчево кон Скопје за сите видови возила се одвива преку регионалниот пат Берово-Виница.