„Владата остана нем набљудувач на катастрофалните поплави во Делчево и ги остави граѓаните сами да се справуваат со последиците“, обвинуваат од опозициската ВМРО-ДПМНЕ
Четириесет и осум часа по катастрофалните поплави во Делчево, нема ни трага ни глас од Владата, помош дадоа само градоначалниците од ВМРО-ДПМНЕ, реагираат од партијата на Христијан Мицкоски.
„Владата остана нем набљудувач на катастрофалните поплави во Делчево и ги остави граѓаните сами да се справуваат со последиците од истите. Единствени што им излегоа во пресрет на делчевчани се околните градоначалници од ВМРО-ДПМНЕ кои веднаш помогнаа со противпожарни возила и екипи од ТППЕ и друг вид опрема, а веднаш потоа единствени кои изгласаа и ветија парична помош се исто така градоначалниците од ВМРО-ДПМНЕ ширум државата“,
велат од ВМРО-ДПМНЕ.
Од ВМРО-ДПМНЕ велат дека се грижат и дека подеднакво им е значаен секој дел од државата, без разлика дали локалната власт е од ВМРО-ДПМНЕ или некоја друга партија.
Инаку, на вонредна седница Советот на Општина Делчево донесе одлука за формирање комисија за проценка на штетите која ќе ја применува методологијата за процена на штети од природни непогоди и други несреќи. Дополнително, донесена е одлука за објава на јавен повик преку кој граѓаните ќе се информираат за постапката за пријавување штети настанати од силното невреме што во четвртокот, на 8 јуни, го погоди градот.