Вицепремиерот потврдува дека зел три дена од ланскиот одмор, ама никој не кажува дали тој навистина бил во Дубаи; Во меѓувреме, ВМРО-ДПМНЕ пресмета дека одмор во Дубаи чини околу 10 илјади евра, а во Мексико, каде што замина Рашковски, двојно повеќе
Вицепремиерот Љупчо Николовски денеска им се вратил на работните обврски, по неколкудневно отсуство кое поттикна шпекулации дека тој заминал на продолжен викенд во Дубаи.
Информациите за наводното патување на Николовски се надоврзаа на веста дека и поранешниот генерален секретар на Владата Драги Рашковски е на одмор во Мексико, во период кога се развива аферата за набавката на софтверот за „ловење“ сообраќајни прекршоци.
Сепак, од Владата, иако потврдуваат дека вицепремиерот во претходните три работни дена бил на одмор, не ја откриваат дестинацијата на која отпатувал, како што и не ги демантираат информациите дека бил во Дубаи.
„Заменикот на претседателот на Владата, задолжен за борба против корупцијата и криминалот, одржлив развој и човечки ресурси, Љупчо Николовски, согласно Законот за работни односи, од приватни причини, користеше одмор од 2020 година, во времетраење од три дена, заклучно со денешниот ден. Николовски од денеска им се враќа на своите работни обврски“,
информираат од кабинетот на Николовски.
И Николовски изјави за „360 степени“ дека користел три дена одмор за, како што вели, приватни потреби.
„Од денеска продолжувам со ангажманите и во Владата и во СДСМ“,
вели Николовски.
Од ВМРО-ДПМНЕ обвинуваат дека Николовски, како и поранешниот генерален секретар на Владата Рашковски, се почестиле со одмор во Дубаи и во Мексико, додека, како што велат од партијата, „народ гладува, повеќе од половина милион граѓани живеат со под две евра на ден, 55 000 ги загубија своите работни места, а 6 200 фирми се затворија“.
Рашковски вчера потврди дека е во Мексико со сопругата, каде што ќе останел до крајот на овој месец, односно 15 дена.
Според Бране Петрушевски, пратеник на ВМРО-ДПМНЕ, Рашковски од аспект на раскош и гламур го надминал Николовски. Како што рече Петрушевски, од тоа што се гледа на интернет-страниците и туристичките агенции, одмор во Мексико во овој период од годината, со хотелско сместување и авионски карти, чини некаде околу 20 000 евра. Одмор во Дубаи, пак, како што рече, чини околу 10 000 евра.
„Само одморот на Рашковски чини колку 200 ваучери за туризам или 200 одмори на просечниот Македонец. Двајцата врвни луѓе на Заев за одмор трошат буквално колку еден стан. За две недели тие ќе потрошат пари колку што се потребни за обезбедување дом за некое семејство кое нема покрив над глава“,
рече Петрушевски.
Министерот за здравство Венко Филипче денеска немаше коментар за тоа што Рашковски заминал на одмор во Мексико, ниту за тврдењата на опозицијата дека Николовски е на одмор во Дубаи. Сепак, тој рече дека владините функционери нема да треба да одат во карантин откако ќе се вратат во земјава, затоа што не се во Африка. Исто така, посочи дека не е загрозена работата на Владата во делот на кризното менаџирање
Премиерот Зоран Заев, пак, изјави вчера дека тој не може да знае каде се сите вработени во Владата и оцени дека секој има право на одмор.
„Верувајте, јас за сите вработени или ангажирани во Владата ниту се обидувам да имам контрола ниту знам. Тие си имаат право на свој одмор, право на одлучување“,
рече Заев.
Според порталот „Нетпрес“, друштво на Николовски во Дубаи, покрај сопругата, му правеле и директорот на ТЕЦ Неготино, Небојша Станковиќ, кој исто така бил придружуван од сопругата. Тие, наводно, со автомобил отпатувале за Белград, а оттаму полетале за Дубаи.