Опозицискиот лидер реагира затоа што владини функционери отпатувале на одмор додека во земјава се влошува ковид-кризата
Секој ден е нова борба за живот, а луѓето од власта трошат по еден стан за одмор, реагираше на Фејсбук лидерот на ВМРО-ДПМНЕ Христијан Мицкоски откако секретарот во Владата Драги Рашковски потврди дека отпатувал во Мексико, а опозициската партија тврди и дека вицепремиерот за спречување корупција Љупчо Николовски е на одмор во Дубаи.
Мицкоски во својот статус набројува дека додека луѓето од власта одмараат на егзотични дестинации:
- Над 60 илјади граѓани ги загубија своите работни места;
- Половина милион граѓани живеат со по 2 евра на ден;
- 3 364 наши сограѓани ги загубија животите поради корона;
- Имаме жестока здравствена криза и полициски час.
Поранешниот генерален секретар на Владата потврди синоќа дека во неделата заминал на одмор во Мексико и дека таму ќе биде до крајот на овој месец.
„Три години не сум бил на одмор, на сопругата ѝ е роденден. Следам сѐ што се случува“,
изјави Рашковски за „Фокус“.