Градскиот Кризен штаб донел заклучок и дека надлежните институции треба итно да ги расчистат и отстранат запаливите материјали кај „Треска“ каде, како што велат, има и цистерна со обем од 20 000 литри на нафтени деривати и истата е огромна опасност
Кризниот штаб на Град Скопје донел заклучок да побара база на податоци од Дирекцијата за заштита и спасување (ДЗС) за да се мапираат потенцијални ризични места во градот каде постојат цистерни или магацини со запаливи или ризични материјали за да има брза превенција од можни хаварии и инциденти предизвикани од пожар.
Заклучокот е донесен по денешниот состанок на Штабот со кој раководи градоначалничката Данела Арсовска, а на кој учествувал и командантот на Противпожарната бригада на Град Скопје, Звонко Томески, директорите на јавните претпријатија и членови на кризниот штаб.
Таква цистерна, која е со обем од 20 000 литри нафтени деривати, има и кај поранешната фабрика „Треска“ каде во минатиот четврток избувна пожар. Во врска со овој настан, уште еден од заклучоците е дека надлежните институции треба да преземат итни мерки за да се расчистат и отстранат запаливите материи и штетниот отпад кај „Треска“.
„Се донесоа заклучоци, меѓу кои и потребата ресорно надлежните институции да преземат итни мерки за расчистување и отстранување на запаливите материјали како и штетниот отпад од поранешната фабрика Треска кој може да го загади воздухот и почвата и воопшто животната средина на жителите кој живеат на тој потег, со што надлежните би можеле да ја отстранат опасноста од загадување и од повторување на пожари. На терен при гасењето на пожарот, пожарникарите кои интервенираа беа изложени на ризик и опасност, како и околните куќи кои ги делеше само еден ѕид од пожарот. На самото место не само што постоеле извесни запаливи материјали во магацините, има и цистерна со обем од 20 000 литри на нафтени деривати и истата е огромна опасност која ја доведува во прашање безбедноста на граѓаните“,
велат од Град Скопје.
Оттаму додаваат и дека Градот ги става на располагање своите капацитети за помош во расчистувањето доколку надлежните утврдат потреба од тоа.