Макрон, од местото на настанот, изјави дека државата е нападната преку нејзините вредности и чувството за слобода
Францускиот претседател Емануел Макрон денеска изјави дека ќе распореди војска во близина на црквите и училиштата со цел да ги заштити клучните локации во земјата.
По денешниот напад во црквата Нотр Дам во Ница, во кој беа убиени три лица, и обраќајќи се од местото на трагедијата, тој рече дека Франција е нападната преку нејзините вредности, преку чувството на слобода, нагласувајќи дека на француско тло се негува слободата на верување.
„И денеска тоа го кажувам сосема јасно: нема да отстапиме“,
истакна претседателот на Франција.
Во терористички напад во Ница денеска загинаа три лица, од кои едното беше обезглавено, додека во друг инцидент полицијата уби вооружен напаѓач кој им се закануваше на минувачите во Авињон.