Во иницијативата од Левица е наведено дека дејствувањето на Здружението е насочено кон уривање на уставниот поредок на Републиката и разгорување на национална омраза и нетрпеливост
Уставниот суд оформи предмет во кој се оспорени Статутот и Програмата на Здружението „Културен центар Иван Михајлов” во Битола. Предметот се наоѓа во почетна фаза, односно во претходна постапка и е предаден на работа кај советник на Судот и судија кои во следниот период треба да подготват реферат со конкретен предлог по којшто Уставниот суд ќе одлучува на седница, информираат од судот.
„Подносител на иницијативата е политичката партија Левица од каде наведуваат дека оспорените Статут и програма се спротивни на членот 20 став 2 од Уставот затоа што се насочени кон разгорување на национална или верска омраза или нетреливост. Во иницијативата е наведено дека дејствувањето на Здружението е насочено кон уривање на уставниот поредок на Републиката и разгорување на национална омраза и нетрпеливост. Подносителот на иницијативата бара поништување на оспорените акти“,
се наведува во соопштението на Уставниот суд.
Што се однесува на вториот предмет, оттаму информираат дека е оформен предмет во кој се оспорува Програмата за работа и Статутот на Здружението за афирмација на културните вредности на македонските бугари „Цар Борис Трети“ во Охрид. И овој предмет се наоѓа во рана фаза – претходна постапка во која се прибираат потребните информации.
Подносител на иницијативата е адвокатот Тони Менкиновски.
„Во иницијативата се наведува дека оспорените акти се противуставни бидејќи се насочени кон насилно уривање на уставниот поредок, попречување на слободното изразување на националната припадност на македонскиот народ, негирање на неговата самобитност и разгорување на национална омраза или нетрпеливост. Подносителот на иницијативата бара поништување на оспорените акти“,
соопштија од Уставниот суд.