Претседателот на здружението „Цар Борис Трети“, Томе Блажевски, нагласи дека од отворањето на здружението пред една година сè било нормално и никој не ги стопирал или не ги попречил во нивната намера. Напротив, вели Блажевски, здружението е отворено пред една година со сите документи, со целата почит кон државата, институциите и законите, а ликот на бугарскиот цар Борис Трети, додаде тој, беше избран поради почитта што ја имаат кон него
По отворањето на бугарскиот клуб „Цар Борис Трети“ во Охрид, кое помина во тензична атмосфера поради протестот инициран од партијата Левица, претседателот на здружението, Томе Блажевски, кажа дека со отворањето на клубот немале намера никого да провоцираат.
„Ние ниту сме помислиле да направиме некоја провокација ниту ништо. Ние си живееме во Охрид, во Македонија. Не сме имале проблем со луѓето. Не сме провоцирале некој“,
изјави Блажевски.
Напротив, вели Блажевски, здружението на бугарскиот културен клуб „Цар Борис Трети“ е отворено пред една година со сите документи, со целата почит кон државата, институциите и законите, а ликот на бугарскиот цар Борис Трети, додаде тој, е избран поради почитта што ја имаат кон него.
Блажевски нагласи дека од отворањето на здружението пред една година сè било нормално и никој не ги стопирал или не ги попречил во нивната намера за отворањето на здружението што го носи името на бугарскиот цар Борис Трети.
„Последнава речиси една година почна да се политизира целата работа и се крена глас против нас. Ние се оградивме дека немаме никаква соработка или некои неонацистички или фашистички движења. Доколку имаме, нека нè судат. Меѓутоа, ние таква работа не сме направиле. Нашето е, како што кажав, само почитувачи и само го избравме ликот на цар Борис како еден бугарски цар и тоа беше сè“,
изјави Блажевски.
Тој додава оти не направиле никаков прекршок и ги запазиле сите закони.
„Ние доколку нешто сме згрешиле, се извинуваме на целата јавност. Не направивме никаков прекршок, ги запазивме сите закони со целиот почит кон државата Република Македонија, кон Македонците. Немаме никаков проблем засега, меѓутоа како што кажав се исполитизира многу работата и се надеваме да си биде сè во ред“,
изјави Блажевски.
За протестот против отворањето на клубот кој беше инициран од Левица, а поддржан од ВМРО-ДПМНЕ, Блажевски вели дека тоа е граѓанско право и дека не можат да запрат никој.
Во пресрет на отворањето на вториот бугарски клуб во земјава, политичката партија Левица иницираше протест во Охрид каде што и е отворен клубот што го носи името на бугарскиот цар Борис Трети. Протестот беше поддржан и од опозициската ВМРО-ДПМНЕ, која повика на масовност.
Протестот помина во тензична атмосфера која дополнително се вжешти кога членовите на клубот прво немо го набљудуваа протестот, а потоа почнаа да им возвраќаат на демонстрантите на бугарски јазик и го развеаја знамето на цар Борис Трети.