Новиот претседател на САД веднаш почна да поништува некои одлуки на неговиот претходник. Тој потпиша одлуки за: враќање на САД во Парискиот договор за климата, за задолжително носење маски, за стопирање на изградбата на ѕидот на границата меѓу САД и Мексико…
Новиот американскиот претседател Џо Бајден, веднаш по влегувањето во Белата куќа, по инаугурацијата, го прочита писмото што, според традицијата, му го остави неговиот претходник Доналд Трамп, оценувајќи го како „многу благородно“.
Зборувајќи од Овалната соба во Белата куќа, Бајден рече дека нема да ја открие содржината на писмото поради почитта кон Трамп.
„Претседателот напиша многу благородно писмо. Бидејќи беше приватно, нема да зборувам за тоа додека не разговарам со него“,
рече Бајден.
Тој потоа потпиша 17 од најавените извршни наредби/декрети и веднаш почна да поништува некои одлуки на Трамп.
Како што им потврди на новинарите во Овалната соба, една од првите наредби што ги потпиша беше повторното ангажирање на САД во Парискиот договор за климата.
Што се однесува до пандемијата, Бајден издаде наредба со која се воведува задолжително носење маска во областите што зависат од сојузните држави, како и при патување меѓу државите во САД, постапка што Доналд Трамп секогаш одбиваше да ја направи.
Една од наредбите се однесува на укинувањето на забраната за влез во САД за државјани на повеќе земји, претежно со муслиманско мнозинство. Забраната беше изгласана само неколку дена откако Доналд Трамп ја презеде функцијата во јануари 2017 година.
Бајден, исто така, го потпиша и стопирањето на изградбата на ѕидот на границата меѓу САД и Мексико, проект со кој неговиот претходник беше прилично горд.
Бајден пред новинарите изјави дека потпишува „храбри“ извршни решенија.
„Нема подобро време за нов почеток од денеска“,
изјави тој пред новинарите.