Меѓу првите чекори на Бајден ќе бидат и потпишување низа наредби со кои ќе се уникат уредби од Трамп, како што е враќање на САД во Парискиот климатски договор и запирање на постапката за излегување од Светската здравствена организација (СЗО)
Досегашниот претседател на САД, Доналд Трамп, заедно со сопругата Меланија, официјално ја напушти Белата куќа и Вашингтон.
Со хеликоптер на вооружените сили, тие се упатија кон воената база „Ендрус“, каде го пречекаа членови на семејството и поддржувачи. Оттаму, за последен пат тој ќе го искористи претседателскиот авион за да замине во резиденцијата во Флорида, каде ќе биде неговото ново живеалиште.
Во своето кусо обраќање од импровизираната говорница на пистата, Трамп на толпата која му ракоплескаше и му скандираше ѝ кажа дека ги сака од дното на своето срце, поединечно заблагодарувајќи им се на членовите на неговиот кабинет.
Заминувањето на Трамп од Белата куќа е во пресрет на инаугурацијата на новиот претседател Џо Бајден. Трамп со ова прекршува традиција и се приклучува на неколкуте претседатели кои не присуствувале на инаугурацијата на своите наследници. Последен пат, ваков случај имало во 1869 година.
Инаугурацијата на Џо Бајден, пак, ќе се одржи денес на пладне по локално време, однос 18 по средноевропско време. Тој ќе биде 46. Претседател на САД, а церемонијата на која ќе стапи на функција за разлика од претходните ќе биде различна поради пандемијата.
Во моментов Бајден се очекува на миса во една католичка црква во Вашингтон. По заклетвата тој ќе го има и своето прво обраќање до нацијата како претседател и како што најавија од неговиот тим за односи со јавноста, тој нема да зборува за Трамп туку за иднината.
Меѓу првите чекори на Бајден ќе бидат и потпишување низа наредби со кои ќе се уникат уредби од Трамп, како што е враќање на САД во Парискиот климатски договор и запирање на постапката за излегување од Светската здравствена организација (СЗО). Со потезите од првиот ден, се очекува тој да стави крај на забрана за посетители од муслимански земји и ќе ја запре изградбата на ѕидот на границата меѓу САД и Мексико за спречување на илегалната имиграција. Бајден треба да потпише и наредба за носење маски во сите федерални објекти.