Пред патувањето, се препорачува граѓаните да се информираат за здравствената состојба, присутните заразни болести и потенцијалните здравствени ризици во земјата или регионот во кој патуваат, а најмалку еден месец претходно да проверат дали за местото кое го посетуваат се препорачува вакцинација или превентивна терапија
По 13 потврдени случаи на западнонилска треска во земјава, која најчесто се пренесува преку убод од заразен комарец, Институтот за јавно здравје (ИЈЗ) издаде препораки до граѓаните кои патуваат во текот на летото.
Пред патувањето, се препорачува граѓаните да се информираат за здравствената состојба, присутните заразни болести и потенцијалните здравствени ризици во земјата или регионот во кој патуваат, а најмалку еден месец претходно да проверат дали за местото кое го посетуваат се препорачува вакцинација или превентивна терапија.
„Да се осигурате дека вие и членовите на вашето семејство, особено децата, ги имате примено сите рутински вакцини, а доколку ви се потребни дополнителни информации, консултирајте се со матичниот лекар или со надлежниот Центар за јавно здравје. Задолжително треба да ги земете лековите кои редовно ги користите, средства за прва помош, антипиретици и аналгетици, лекови за гастроинтестинални тегоби, средство за дезинфекција на раце, репелент против инсекти, крем за сончање со заштитен фактор СПФ 30 или повисок и здравствена документација и полиса за патничко здравствено осигурување (доколку поседувате)“,
се наведува во препораките на ИЈЗ за заштита на здравјето при патување.
За заштита од комарци, ИЈЗ препорачува граѓаните да нанесуваат репеленти, односно средства кои ги одбиваат комарците, особено доколку патуваат во подрачја каде има ризик од заболувања што се пренесуваат преку овие инсекти. Ваквите средства може да се користат во секој период од денот, во затворен и на отворен простор, строго според упатството на производителот, особено по капење, пливање или интензивно потење.
„Се препорачува употреба на репеленти на база на DEET (30–50 проценти) или икаридин (icaridin/picaridin) кои треба да се нанесуваат на непокриените делови од кожата, да се избегнува контакт со очите, носот и устата. Ако користите и крем за сончање, најпрво нанесете го него. Комарците кои пренесуваат денга, чикунгуња и зика се најактивни во текот на денот, особено во раните утрински и доцните попладневни часови, додека комарците кои ја пренесуваат маларијата се најактивни од самрак до изгрејсонце“,
велат од ИЈЗ.
На бремените жени, доилките и децата им се препорачува да користат само средства против комарци што се безбедни за нив и секогаш да ги следат упатствата за нивна употреба. За време на патувањето, ИЈЗ препорачува капење, пливање и нуркање само на уредени и безбедни капалишта каде што квалитетот на водата се контролира.
„Избегнувајте капење во води со видливо загадување, необична боја, непријатен мирис, присуство на отпад или прекумерен развој на алги, внимавајте да не голтате вода при капење и внимавајте малите деца да не внесуваат вода во устата. По капење, истуширајте се со чиста вода и измијте ги рацете пред јадење, доколку имате отворени рани или оштетувања на кожата, избегнувајте капење во природни водни површини, почитувајте ги предупредувањата и препораките на надлежните служби за безбедност на капалиштата, не дозволувајте деца да престојуваат покрај вода без постојан надзор. При пловење задолжително користете спасувачки елек, избегнувајте капење во реки, езера и други слатководни површини во земји каде има ризик од заболувања како шистозомијаза и лептоспироза“,
препорачуваат од ИЈЗ.
На граѓаните кои патуваат им се препорачува кога е можно да престојуваат во климатизирани простории или во простории со заштитни мрежи на прозорците и вратите, а доколку спијат на отворено или во простории без соодветна заштита, да користат заштитна мрежа за спиење, по можност третирана со инсектицид.
„Доколку за време на патувањето добиете зголемена телесна температура (38 °C или повисока), осип, силна главоболка, повраќање или други симптоми на заболување, веднаш побарајте медицинска помош. Маларијата и другите тропски заболувања можат брзо да напредуваат и бараат навремено лекување. Доколку во рок од три недели по враќањето имате зголемена температура или други симптоми на заразна болест, задолжително информирајте го вашиот лекар каде и кога сте патувале“,
додаваат од Институтот за јавно здравје.