Пратеникот на ВМРО-ДПМНЕ кој според пресудата на кумановскиот суд треба да му плати на својот колега од СДСМ Мартин Костовски 150 000 денари плус камата за навреда и клевета, денеска најави и дека со претставка до Судскиот совет ќе бара разрешување на судијата кој ја донел ваквата пресуда
Костовски, пак денеска од прес-центарот на Собранието изјави дека не саака да ја коментира судската пресуда, бидејќи е активна странка во судскиот просец со Петрушевски, а на прашањето на која одредба се повикал во тужбата рече дека во Законот за граѓанската одговорност има одредба која вели дека доколку се докаже дека навредата е искажана со цел да омаложави и навреди тогаш ќе сноси одговорност
Пратеникот на ВМРО-ДПМНЕ Бране Петрушевски денеска порача дека ќе ги искористи сите правни лекови за да докаже дека одлуката на Основниот суд во Куманово кој пресуди во корист на неговиот колега од СДСМ, Мартин Костовски, кој го тужеше за навреда и клевета е неуставна и незаконска.
И Петрушевски и Костовски своите ставови околу граѓанската парница што ја доби пратеникот на СДСМ денеска ги изложија од говорницата во прес-центарот на Собранието.
Додека за пратеникот на ВМРО-ДПМНЕ пресудата се коси со Уставот и со закон, Костовски не сакаше да ја коментира одлуката на кумановскиот суд, посочувајќи дека бил принуден да го тужи својот колега, откако тој не се извинил за навредите што ги изнел од собраниската говорница.
Во пресудата, која Петрушевски ја објави на Фејсбук, може да се види дека тој на пратеникот Костовски треба да му исплати 150 илјади денари плус законска камата за душевна болка предизвикана од навреда искажана од собраниската говорница.
Петрушевски, како што и претходно деновиве наведе на социјалните мрежи „за прв пат во историјата на плурална Македонија, а најверојатно и во историјата на демократскиот свет пратеник е осуден за став и мислење искажани од собраниската говорница“.
„Ваквата пресуда е противуставна, противзаконска и се коси со повеќето меѓународни конвенции кои се ратификувани од Република Македонија. Противуставна е затоа што согласно членот 64 од Уставот пратеникот ужива имунитет, на којшто јасно и недвосмислено се повикав во самата постапка. Противзаконска е од најмалку две причини. Најпрвин затоа што се крши членот 16 од Законот за пратеници каде што е наведено јасно и недвосмислено дека пратеникот не може да биде повикан на кривична или друга одговорност за став искажан на собраниска говорница и во работните тела на Собранието. Меѓутоа, незаконска е и врз основа на Законот за граѓанска одговорност за клевета и навреда каде што во членот 7 се наведени исклучоците од ваквата одговорност, а еден од исклучоците кога таа клевета и навреда е сторена во Собранието и неговите работни тела“,
рече Петрушевски на прес-конференцијата во Собранието.
Убеден е дека, како што рече, овие закони ги знаел и судијата кој ја донел пресудата, како и неговиот колега од редовите на СДСМ и неговиот адвокат.
„Меѓутоа ова е само уште еден доказ на она што го пишуваат сите меѓународни и домашни релеватни институции, она што го пишува во Извештајот на Европската комисија, а тоа е дека судството е под сериозно влијание и притисок од власта“,
рече Петрушевски.
Говорејќи во овој контекст, тој рече дека ако се земат предвид и другите предмети за клевета и навреда кои што се донесени во овој период, а се насочени против новинарите, најверојатно алудирајќи на случајот „Фероинвест против ИРЛ“, јасно е дека власта „сака да создаде тоталитарен режим во кој никој не смее да ги критикува“.
Петрушевски порача дека нема да застане овде и дека ќе ги искористи сите правни лекови коишто му стојат на располагање, па дури и ако потребно ќе се обрати до Меѓународниот суд за човекови права во Стразбур.
„Меѓутоа ќе барам со претставка и до републичкиот Судски совет судијата којшто донел ваква преседан-одлука да биде разрешен. За ваквата пресуда ќе ги информирам меѓународните институции како ОБСЕ, Европската комисија (ЕК), ќе ги запознам сите наши пријателски амбасади и нормално ќе го информирам согласно Деловникот и претседателот на Собранието Талат Џафери од кого ќе барам исто така соодветна реакција. Затоа што овде не е во прашање Бране Петрушевски и неговите права, овде е во прашање грубата повреда на слободата на говор и грубата повреда на демократијата која никако како општество не смееме да ја дозволиме“,
рече Петрушевски.
Прашан на што се повикал судијата кога ја донел пресудата, пратеникот на ВМРО-ДПМНЕ рече дека со неговото скромно познавање на правото не видел повикување на членови и закони и ги повика новинарите за тоа да се консултираат со правниците.
„Меѓутоа видов дека експлицитно стои дека сум сторил клевета и навреда во Собрание од собраниска говорница при мој говор што е тотално противуставно, противзаконски и се коси со сите меѓународни конвенции“,
додаде тој.
На говорницата во прес-центарот во Собранието по него застана тужителот во случајот Костовски, кој прашан за коментар на најавите на Петрушевски, рече дека тоа е одлична работа и една од придобивките на демократијата.
„Како правна држава Република Македонија овозможува на секој којшто не задволен од првостепена пресуда на основен суд да оди во погорна инстанца со цел да се докаже вистината. Јас нема да коментирам судски одлуки бидејќи како активна странка во процесот против мојот колега Бране Петрушевски го искористив правото, првин побарав лично да ми се извини за сите оние искажани навреди клевети, гнасотии на мое конто, на мое име и презиме. Пред сè и над сè јас ќе зборувам емотивно, ние сме луѓе кои што сме од крв и од месо, семејни луѓе за кои секоја искажана невистина, лага, навреда не погодува и единствено кога немаше реакција од негова страна го повикав дали тоа да биде на прес-конференција, на говорница, дали преку статус на социјалните мрежи едноставно да се извини и да каже дека сето она што го кажал не е вистина бидејќи и мене и моето семејство и моето опкружување не доведе во ситуација на вознемиреност, во ситуација да бидеме повредени од сите оние работи и гнасотии што ги кажа“,
рече Костовски.
На прашањето од новинарите кој бил правниот основ на кој се повикал во тужбата против својот колега за навреда и клевета, бидејќи станува збор за прв случај кога пратеник е осуден за искажан збор од собраниска говорница, тој упати на Законот за граѓанска одговорност во делот за клевета и навреда.
„Мене ми е жал што немате доволно информации. Веќе има една пресуда и тоа за пратеник од Социјалдемократскиот сојуз, за мојата сограѓанка (Лидија) Тасевска, којашто исто така во кампањата против Максим Димитриевски во улога на пратеник искажа некои работи и судот донесе пресуда… Јас кажав дека врз основа на разговор со мојот адвокат, јас не сум така неинформирам човек и да влезам во некоја работа се со единствена цел да се бламирам. По барањето од моја страна да се извини не добив никаква реакција и бев принуден во одбрана на честа и угледот, на моето име и презиме да постапам на ваков начин. Може да ве упатам да го разгледате Законот за граѓанска одговорност во делот за клевета и навреда каде што има изземање за истапување на собраниска говорница, на говорница на советите на локалните самоуправи, меѓутоа тука има и одредба која повикува дека доколку се докаже дека таквото истапување на тужениот е со некаква намера и задна цел ќе сноси одговорност“,
вели Костовски.