Петров: Истрагата за автобуската несреќа најверојатно ќе биде затворена, виновен е возачот

Автобусот на „Беса Транс“ удри во оградата на автопатот „Струма“ во раните утрински часови на 23 ноември. Веднаш по ударот автобусот се запали, при што загинаа 45 луѓе, а се спасија седум од патниците

Заклучокот од истрагата е дека единствена причина за трагедијата е човечка грешка на возачот, a случајот најверојатно ќе биде затворен, најави бугарскиот истражител Петров

Истрагата за сообраќајната несреќа на автопатот Струма, во Бугарија, во која загинаа 45 граѓани на Северна Македонија е завршена, изјави за БТВ истражителот на бугарската Национална истражна служба, Младен Петров.

Како што јави дописникот на МИА од Софија, заклучокот од истрагата е дека единствена причина е човечка грешка на возачот, а поради непостоење на виновно однесување, случајот речиси сигурно ќе биде затворен.

Петров изјави дека само однесувањето на возачот на македонскиот автобус е причина за настанување на таквата состојба и несреќата.

Сарафов за автобуската несреќа во Бугарија: Брзината на автобусот била несоодветна за условите на патот

Проверени се сите претпоставки за присуство на запаливи течности во автобусот и како што рече,  јасно е утврдено дека такви немало. Според истражителот, истрагата утврдила дека видливоста била добра и немало магла.

Бугарскиот тим истражители, исто така, ја отфрла верзијата дека ознаката можеби е причина за несреќата. Според Петров, хоризонталните ознаки на патот и страничните ознаки биле малку избледени, но не и невидливи.

„Средната, централна линија што ги дели лентите е прилично светла и секако видлива“,

рече Петров.

Во конкретната ситуација, вели Петров, насочувањето на автобусот на „Беса транс“ од активната коловозна лента и ударот во заштитната ограда довело до продирање и уништување на конструктивни елементи, притисок на резерворот за гориво и компресија на неговата содржина.

„Ова е придружено со обилни искри од триење, кое ја достигнало потребната температура и притисок за да се запали горивото“,

изјави истражителот Младен Петров.

Тој најави дека сега се чека преглед на мислењето на истражниот тим, кое ќе го вршат обвинители.

„Нашето мислење е дека нема виновно однесување што е причинско-последична врска за овој резултат“,

рече Петров, посочувајќи дека истрагата најверојатно ќе биде прекината.  

Автобусот на „Беса Транс“ удри во оградата на автопатот „Струма“ кај село Боснек во раните утрински часови на 23 ноември. Веднаш по ударот автобусот се запали, при што загинаа 45 луѓе, а се спасија седум од патниците.