Иако прашањето е во директна надлежност на Европската Унија и шенген-зоната, министерот објасни дека државата презема конкретни чекори преку склучување билатерални договори со одделни земји членки за надминување на последиците
Владата и Министерството за транспорт интензивно работат на изнаоѓање решенија за проблемите со кои се соочуваат македонските превозници по воведувањето на системот ЕЕС (Entry/Exit System) во Европската Унија, изјави денеска вицепремиерот и министер за транспорт Александар Николоски.
Одговарајќи на новинарско прашање во врска со најавите од дел од превозниците за можни протести доколку до 1 септември не се најде решение, Николоски истакна дека Владата има редовна комуникација со превозничките здруженија и дека им дава целосна поддршка.
„Имаме редовни средби, ако не на една недела, тогаш на две недели. Имаме одлична соработка. Ова прашање е едно од стотиците прашања што ги решаваме. Во однос на проблемот што настана со воведувањето на ’Ентри-егзит’ системот на Европската Унија, ние го правиме нашиот максимум и превозниците имаат целосна поддршка“,
истакна Николоски.
Иако прашањето е во директна надлежност на Европската Унија и шенген-зоната, министерот објасни дека државата презема конкретни чекори преку склучување билатерални договори со одделни земји-членки за надминување на последиците.
Македонија веќе има вакви договори со Хрватска, Швајцарија и Романија, додека во моментов интензивно се работи на усогласување договори со Австрија, Унгарија и Германија.
„Очекувам во текот на октомври да започнеме разговори и со Словенија и на тој начин да бидат покриени земјите каде што нашите превозници најчесто работат или транзитираат“,
додаде тој.
Коментирајќи ги најавените протести од страна на дел од превозниците, Николоски нагласи дека тие не се најдобриот пат за надминување на предизвиците.
„Поконструктивно е да наоѓаме решенија. Не мислам дека протестите се решение. Секако, тие се крајна форма, но ние во изминатиот период наоѓаме решенија и ќе продолжиме да ги наоѓаме“,
рече тој.
Министерот, исто така, изрази сомнеж дека зад дел од притисоците поврзани со ова прашање стојат и политички мотиви од соседството.
„Она што го добив како чувство е дека една соседна држава прави притисок за таа работа пред сè од политички причини. Нека си ги решаваат своите проблеми. Ние имаме индивидуален пристап и ќе ги решаваме проблемите онака како што мислиме дека е најдобро“,
истакна тој.
Николоски рече дека не се согласува со пристапот проблемите на сите држави од регионот да се третираат колективно под етикетата „Западен Балкан“, подвлекувајќи дека Македонија мора самостојно да ги застапува своите интереси.
„Не смееме да паѓаме во замката на колективизација на проблемите. Долго време има обид целиот регион да биде претставен како едно. Ние славиме 35 години независност за некоја недела и враќањето назад би било најлошото нешто што може да ѝ се случи на државата“,
кажа Николоски.
Здруженијата на превозници од Западен Балкан, на регионалната средба што пред три дена се одржа во Скопје, рекоа дека ќе чекаат до 1 септември кога во Брисел е закажан состанок на повисоко ниво со претставници на Европската комисија, од чиј исход ќе зависи дали ќе преминат кон протести.
Тие велат дека не сакаат да протестираат, но ако бидат принудени, ќе го преземат овој чекор со тоа што протестите нема да прекинат како минатиот пат, туку ќе траат до исполнување на нивните барања за престој на професионалните возачи во шенген-зоната.
Македонските, како и професионалните возачи на камиони од Србија, Црна Гора и Босна и Херцеговина, од крајот на минатата година се соочија со проблем откако почна воведувањето на системот за влез и за излез од Европската Унија (ЕЕС), според кој превозниците од Западен Балкан се регистрираат како туристи и можат да останат во земјите од ЕУ најмногу 90 дена, во период од 180 дена.
Николоски и во јули изјави дека проблемот со професионалните возачи земјава го решава самостојно преку билатерални разговори со држави од Европската Унија, а не заедно со другите земји до Западен Балкан.